Дар Вазорати тандурустӣ ва ҳифзи иҷтимоии аҳолии Ҷумҳурии Тоҷикистон вазири тандурустӣ ва ҳифзи иҷтимоии аҳолии Ҷумҳурии Тоҷикистон Ҷамолиддин Абдуллозода бо сардори шуъбаи Ташкилоти минтақавии Аврупоии Созмони умумиҷаҳонии тандурустӣ Павел Урсу вохурӣ намуд. Дар вохурӣ ҳамзамон роҳбари дафтари ТУТ дар Тоҷикистон Виктор Олшавский, сардорони раёсат ва мудирони шуъбаҳои дахлдори вазорат низ иштирок доштанд.
Бино ба иттилои Вазорати тандурустӣ ва ҳифзи иҷтимоии аҳолии Ҷумҳурии Тоҷикистон, Ҷамолиддин Абдуллозода аз ҳамкории мутақобилан судманди вазорат бо ташкилоти мазкур изҳори қаноатмандӣ намуда, барои дастгириҳои пайвастаи соҳа ба роҳбарияти ташкилоти мазкур изҳори миннатдорӣ баён дошт.
Дар идомаи мулоқот ҳамкориҳои дуҷонибаи вазорат бо ташкилоти мазкур мавриди баррасӣ қарор дода шуда, атрофи масоили мавриди таваҷҷуҳи тарафайн мубодилаи афкор сурат гирифт.
