Рӯзи 31 августи соли 2022 дар кишвари Сингапур дар ҳошияи 10-умин Форум оид ба содагардонии савдо дар минтақаи Осиё ва Уқёнуси Ором ҷаласаи 17-уми Гурӯҳи кории СПЕКА оид ба савдо баргузор гардид. Дар кори он муовинони вазирон ва намояндагони кишварҳои Озарбойҷон, Қазоқистон, Қирғизистон, Тоҷикистон, Туркманистон ва Ӯзбекистон, инчунин намояндагон аз созмонҳои бонуфузи байналмилалӣ намуданд. Чорабиниро Муовини вазири рушди иқтисод ва савдо Абдураҳмонзода Абдураҳмон Сафаралӣ раисӣ намуд, хабар медиҳад радиои “Овози тоҷик” дар такя ба Вазорати рушди иқтисод ва савдои Ҷумҳурии Тоҷикистон.
Абдураҳмонзода А. С. ҷаласаро ифтитоҳ намуда, ҳамчун раиси Гурӯҳи кории қайдгардида оид ба корҳои иҷрогардида дар доираи СПЕКА, аз ҷумла масъалаҳо вобаста ба тақвияти ҳамкорӣ байни кишварҳои аъзои СПЕКА, Стратегия ва Харитаи роҳи СПЕКА оид ба содагардонии расмиёти савдо, тавсеа ва татбиқи минбаъдаи ҳадафҳо барои савдои устувор дар минтақа, таҳқиқот ва тавсияҳо вобаста ба монеаҳои ғайритарифӣ дар савдо дар давраи пандемия маълумоти муфассал пешниҳод кард.
Қайд намуд, бо мақсади тақвияти иқтидори содиротӣ ва диверсификатсияи содирот дар самти содагардонии расмиёти савдо дар Ҷумҳурии Тоҷикистон як қатор корҳои назаррас амалӣ шуданд.
Аз ҷумла, Кумитаи ҳамоҳангсоз оид ба содагардонии расмиёти савдо таъсис дода шуда, Портали савдои Тоҷикистон ва низоми «Равзанаи ягонаи барасмиятдарории амалиёти содиротӣ, воридотӣ ва транзитӣ дар Ҷумҳурии Тоҷикистон» расман мавриди истифода қарор дошта, инчунин якчанд ҳуҷҷатҳои стратегии марбут ба савдо қабул гардидаанд, ки ҷиҳати дар сатҳи зарурӣ татбиқ намудани ҳадафҳои стратегии СПЕКА ва тақвияти ҳамгироии тиҷоратии минтақавӣ мусоидат менамояд.
Муовини вазири рушди иқтисод ва савдо таъкид кард, ки ҳамкориҳои тиҷоратӣ бо кишварҳои аъзои СПЕКА марҳила ба марҳила дар ҳоли рушд қарор дорад, аз ҷумла сарфи назар аз таъсири манфии пандемияи ҷаҳонии COVID-19 гардиши савдои хориҷӣ миёни Тоҷикистон ва кишварҳои Осиёи Марказӣ дар шаш моҳи соли 2022 934,4 миллион доллари амрикоиро ташкил додааст, ки нисбат ба ҳамин давраи соли 2021 тақрибан 20 фоиз афзоиш ёфтааст.
Ҳамзамон, дар доираи ҷаласа аз ҷониби коршиносони ташкилотҳои байналмилалӣ вобаста ба мавзӯҳои баррасигардидаи чорабинӣ ва рушди робитаҳои минтақавӣ рӯнамоҳо пешниҳод карда шуд.
Қайд бояд кард, ки Тоҷикистон раисии Гурӯҳи кории СПЕКА оид ба савдоро ба уҳда дорад ва ҷаласаҳои он ҳамасола дар чаҳорчӯбаи чорабиниҳои СПЕКА дар яке аз кишварҳои минтақа баргузор мегардад.
Дар охири чорабинӣ аз ҷониби Раиси гурӯҳи корӣ- Абдураҳмонзода А. С. ҷиҳати тақвияти ҳамкориҳои минбаъда дар соҳаи савдо байни кишварҳои манфиатдор тавсияҳои мушаххас пешниҳод карда шуд.
АХБОРИ МОНАНД:
Сафаралӣ Қурбонзода болоравии нархи маҳсулоти нафтиро шарҳ дод
Пули азими километри 267 — уми роҳи мошингарди Душанбе – Чаноқ ба истифода дода шуд
Зиёдшавии маоши вазифавии кормандони соҳаҳои маориф, илм, фарҳанг ва иҷтимоӣ
Миёни соҳибкорони вилояти Суғд ва кишвари Красноярск 9 созишномаи ҳамкорӣ ба имзо расид
