Ба Вазорати тандурустӣ ва ҳифзи иҷтимоии аҳолии Ҷумҳурии Тоҷикистон дар доираи лоиҳаи ташхиси сайёри COVID-19 панҷ озмоишгоҳи сайёри санитарию эпидемиологӣ супорида шуд. Дар ин бора аз Маркази матбуотии вазорати мазкур хабар доданд.
Ба иттилои манбаъ, озмоишгоҳҳои санитарию эпидемиологӣ бо дараҷаи бехатарии биологӣ, инчунин системаҳои тестӣ барои ташкили корҳо оид ба ташхиси COVID-19 харидорӣ карда шудаанд.
Қобили зикр аст, ки лоиҳаи мазкур дар доираи Созишномаи грантӣ аз ҷониби Фонди Авруосиёии субот ва рушд барои маблағгузории лоиҳаи ташхиси мобилии COVID-19, ки 8 октябри соли 2021 ба имзо расидааст, амалӣ карда мешавад.
Дар татбиқи лоиҳа Вазорати тандурустӣ ва ҳифзи иҷтимоии аҳолии Ҷумҳурии Тоҷикистон, Вазорати молияи Ҷумҳурии Тоҷикистон иштирок намуда, вазифаҳои гурӯҳи татбиқи лоиҳа ба зиммаи Фонди Русия «СПИД Инфосвязь» гузошта шудааст.
