Пешниҳод гардид, ки дар Душанбе барои мутахассисони роҳи оҳан ва метро Маркази омӯзишӣ ва такмили ихтисос таъсис дода шавад.
26 феврал Вазири нақлиёти Ҷумҳурии Тоҷикистон Азим Иброҳим бо Директори навтаъйиншудаи Дафтари Агентии ҳамкории байналмилалии Корея (Korea International Cooperation Agency, KOICA) ҷ-би Канг Синг Хон ва муовини ӯ Чангвон Ли мулоқот кард.
Дар ҷараёни мулоқот Вазири нақлиёт Азим Иброҳим ҷаноби Канг Синг Хонро ба муносибати таъйин шуданаш ба вазифаи Директори Дафтари КОICА дар Тоҷикистон шодбош гуфта, изҳори итминон намуд, ки дар давраи маъмурияти ӯ ҳамкориҳои Тоҷикистону Корея дар соҳаи нақлиёт тавсеаи бештар пайдо хоҳанд кард.
Вазири нақлиёт илова намуд, ки Тоҷикистон ва Корея айни ҳол 4 лоиҳаи хурду бузургро дар самти роҳу нақлиёт якҷоя амалӣ мекунанд, ки яке аз онҳо ба асосноккунии техникию иқтисодии лоиҳаи сохтмони роҳи оҳани «Ҷалолиддини Балхӣ – Панҷи Поён» рабт дорад ва бо дастгирии КОICА оғоз гардидааст.
Мавриди зикр аст, ки татбиқи лоиҳаи мазкур 14 январи соли 2025 расман оғоз гардида буд.
Ҷаноби Канг Синг Хон минатдории худро ба Вазири нақлиёти Тоҷикистон барои рушди ҳамкориҳои дуҷониба дар соҳаи роҳу нақлиёт ва кӯшишҳои пайвастаи вазорат ҷиҳати боз ҳам тақвият бахшидани ҳамдастиҳо дар ин самт изҳор дошт. Номбурда зикр намуд, ки КОICА барои татбиқи марҳилаҳои минбаъдаи лоиҳаи мазкур, ки ҳам барои Тоҷикистон ва ҳам барои минтақа аҳамияти стратегӣ дорад, омода ва ҳавасманд мебошад. Мавсуф илова кард, ки татбиқи муваффақонаи лоиҳа метавонад ба густариши гардиши молу маҳсулот дар минтақа тавассути қаламрави Тоҷикистон мусоидат намояд.
Канг Синг Хон пешниҳод намуд, ки бо мақсади баланд бардоштани малакаи касбии мутахассисони соҳа, алалхусус машинистони локомотив, муҳандисон, устоҳо ва танзимгарони ҳаракати вагонҳои роҳи оҳан ва метро, дар шаҳри Душанбе маркази омӯзишӣ ва такмили ихтисос таъсис додан ба максад мувофиқ хоҳад буд. Ин пешниҳод аз ҷониби Вазири нақлиёти Тоҷикистон маъқул донниста шуд.
Дар интиҳо, ҷонибҳо иброз намуданд, ки барои иҷрои уҳдадориҳое, ки барои татбиқи лоиҳа пешбинӣ шудаанд, тамоми чораҳои амалиро сари вақт ва бо ҷалби мутахассисони ҳирфаӣ амалӣ менамоянд.
