Дар доираи бозии даври дуюми марҳилаи гурӯҳии Лигаи Қаҳрамонҳои Осиё дар гурӯҳи ”Е” дастаҳои «Ал-Наср» ва «Истиқлол» ба ҳам омаданд. Вохӯрии дастаҳои дар варзишгоҳи «Ал-Аввал Парк»-и шаҳри Риёз баргузор гардида, бо ҳисоби 3 бар 1 ба суди мизбонон анҷом ёфт.
Дар қисми аввали бозӣ дастаи «Истиқлол» дар ҳисоб пешсаф буд. Сенин Себай дар дақиқаи 44-ум голи бошгоҳи «Истиқлол»-ро ба самар расонид. Ин аввалин голи «Истиқлол» дар мавсими нави Лигаи Қаҳрамонҳои Осиё дар мавсими 2023/24 маҳсуб мешуд.
Қисми дуюми бозӣ комилан ранги дигар гирифт. Ситораи асосии дастаи «Ал-Наср» — Криштиану Роналду дар дақиқаи 66-ум ҳисобро мусовӣ 1 бар 1 кард.
Ин голи аввали Роналду дар Лигаи Қаҳрамонҳои Осиё буд, ки ба дарвозаи Рустам Ятимов зад. Бо гузаро шудани 6 дақиқа бозигари бразилӣ Андерсон Талиска бо сар тӯбро вориди дарвозаи Ятимов кард. Ирсоли головарро Абдулраҳмон Ғариб ба Талиска таъмин кард.
Дар дақиқаи 77-уми бозӣ пас аз бозигузории хуби Ғариб ва Талиска дар канори рост, ҳисоб 3 бар 1 гардид. Талиска бо зарбаи қавӣ голи дуюмашро дар вохӯрии имрӯза, ба самар расонид.
Бо ҳамин натиҷа, бозии муҳим, душвор ва таърихӣ барои футболбозони тими «Истиқлол» анҷом ёфт. Воқеан, бозигарони мо имрӯз муқобили дастае, ки ҳайаташ аз ситораҳои футболи аврупоӣ таркиб ёфтааст, бозии арзанда нишон дода, ҳатто бо ғалаба дар қисми аввал ҳамагонро ба ҳайрат оварданд.
Дар бозии дигари гурӯҳ «Ал-Дуҳайл» бо ҳисоби 0 бар 1 аз «Персеполис» мағлуб шуд. Ягона голро Умид Алишоҳ ба самар расонид.
Ёдовар мешавем, ки дар даври 3-юми бозиҳои марҳилаи гурӯҳии Лигаи Қаҳрамонҳои Осиё рӯзи 24-уми октябр «Истиқлол» дар сафар бо «Персеполис»-и Эрон ва «Ал-Наср» дар сафар дар ҳамин рӯз бо «Ал-Дуҳайл»-и Қатар андари майдони рақобат мегарданд.
