15 сентябри соли 2022 дар Самарқанд дар ҳошияи ҷаласаи Шӯрои сарони давлатҳои аъзои Созмони ҳамкории Шанхай мулоқоти вазири корҳои хориҷии Ҷумҳурии Тоҷикистон Сироҷиддин Муҳриддин бо муовини дабири кулли Созмони Милали Муттаҳид оид ба масъалаҳои сиёсӣ ва сулҳофаринӣ Розмари Дикарло баргузор гардид.
Зимни мулоқот, ҷонибҳо масъалаҳои мубрами ҳамкориҳои Тоҷикистон ва Созмони Милалро бо таваҷҷуҳ ба пешрафт дар ноилшавӣ ба Ҳадафҳои Рушди Устуворро баррасӣ карданд.
Мусоҳибон ба масъалаи тағйирёбии иқлим ва таъсири он ба захираҳои об диққати махсус зоҳир намуданд. Муовини дабири кулл ба Тоҷикистон барои ташаббусҳои байналмилалӣ ва нақши пешсафияш дар соҳаи дипломатияи об дар сатҳи ҷаҳонӣ изҳори сипос кард.
Ҷонибҳо ҳамчунин роҷеъ ба масъалаҳои амнияти минтақавӣ, бахусус вазъи Афғонистон табодули назар намуданд. С.Муҳриддин ба самъи намояндаи воломақоми СММ мавқеи Тоҷикистонро оид ба вазъият дар Афғонистон расонид. Дар навбати худ, Р.Дикарло нисбат ба арзёбиҳои ҷониби Тоҷикистон изҳори мувофиқат намуда, омодагии СММ ва ниҳодҳои онро барои расонидани кӯмак ва дастгирии ҳамаҷониба ба Тоҷикистон дар мубориза бо чолишҳо ва таҳдидҳои амниятӣ тасдиқ кард.
