
Рӯзи 11-уми ноябр гуруҳи кории Комиссияи байнидавлатии сайёҳии Ҷумҳурии Исломии Эрон ба Тоҷикистон меояд. Дар ин бора Тоҷиддин Ҷӯразода, раиси Кумитаи рушди сайеҳии назди Ҳукумати Ҷумҳурии Тоҷикистон зимни мулоқот бо Тоҷиддини Ризвон, мухбири радиои “Овози тоҷик” иттилоъ дод.
Ба зикри Тоҷиддин Ҷӯразода, зимни ин сафар рӯзҳои 11, 12 ва 13 ноябр миёни гуруҳҳои кории Тоҷикистону Эрон мулоқотҳои корӣ дар назар аст. Ҳамзамон, дар ин доира Форуми сайёҳии Тоҷикистону Эрон доир мегардад, ки дар ҳошияи он ширкатҳои сайёҳии ҷонибҳо имкони бастани шартномаҳои ҳамкориро доранд.
Бояд гуфт, ки тавсеаи ҳамкории Ҷумҳурии Тоҷикистон ва Ҷумҳурии Исломии Эрон дар бахши сайёҳӣ соле қабл дар мулоқоти раиси Кумитаи рушди сайёҳии назди Ҳукумати Ҷумҳурии Тоҷикистон бо Вазири мероси фарҳангӣ, гардишгарӣ ва саноати дастии Ҷумҳурии Исломии Эрон Сайид Иззатуло Зарғомӣ дар шаҳри Душанбе мавриди баррасӣ қарор гирифта буд.
Баъди ин дидор 9 июн Фестивали сайёҳии Тоҷикистон ва Эрон баргузор гардид, ки дар он дар баробари намояндагони Вазорати мероси фарҳангӣ, гардишгарӣ ва саноеи дастии Эрон ва Кумитаи рушди сайёҳии Тоҷикистон, роҳбарони ширкатҳои сайёҳии ҳарду кишвар, анҷуманҳо, намоишгоҳҳои сайёҳӣ ва воситаҳои ахбори омма ширкат варзиданд. Дар ин чорабинӣ мусаввараҳо ва филмҳо дар бораи ҷозибаҳои сайёҳии Тоҷикистон ба намоиш гузошта шуда, дар фарҷоми он қарордодҳои ҳамкорӣ байни ширкатҳои Тоҷикистон ва Эрон ба имзо расиданд.