Дар вилояти Суғд дар 11 моҳи соли ҷорӣ 1,7 млн тонна ангишт истихроҷ шудааст, ки нисбат ба ҳамин давраи соли гузашта 165,1 ҳазор тонна зиёд буда, ба 110,7 фоиз баробар мебошад.
Бино ба иттилои Хадамоти матбуотии Раиси вилояти Суғд, тибқи маълумоти оморӣ имрӯзҳо дар вилоят 7 корхона, аз ҷумла, ҶСК “Ангишт” дар шаҳраки Шӯроби шаҳри Исфара, КФ “Шахтаи Фон Яғноб”, ҶДММ “Талко ресурс”, воҳиди махсуси ҶДММ “Комбинати металлургии тоҷик” дар ноҳияи Айнӣ, ҶДММ “Сиёвуш”, ҶДММ “Дион ангишти Тоҷикистон” дар шаҳри Панҷакент ва ҶДММ “Қудрат 2010” дар ноҳияи Куҳистони Мастчоҳ ба истихроҷи ангишт машғул мебошанд.
Корхонаҳои истихроҷи ангишти вилоят дар баробари қонеъ намудани талаботи аҳолӣ ва соҳаҳои иқтисодиву иҷтимоии вилоят ба ангишти хушсифат, инчунин ба дигар минтақаҳои Ҷумҳурии Тоҷикистон, аз ҷумла Маркази барқу гармидиҳии шаҳри Душанбе ангишти худро интиқол дода истодаанд.
Ба иттилои манбаъ, тибқи маълумоти раёсати гумрукӣ дар вилоят давоми 11 моҳи соли ҷорӣ ба вилоят 92,2 ҳазор тонна ангишт ба маблағи умумии 4,5 млн доллар аз хориҷи кишвар ворид шудааст. Таҳлилҳо нишон доданд, ки миқдори ангишти воридшуда ба 5,4 фоизи миқдори ангишти дар вилоят истихроҷшуда баробар мебошад.
