Саннаи 25 май дар шаҳри Бохтари вилояти Хатлон 3-юмин Форуми байналмилалии содиротии Бохтар Фуд-2023 баргузор гардид, ки дар он «Саноатсодиротбонк» низ иштирок намуд. Дар ин бора аз бонки мазкур ба радиои «Овози тоҷик» хабар доданд.
Барои таблиғи хизматрасониҳо Филиали «Саноатсодиротбонк» дар шаҳри Бохтар аз ин майдони имконияти васеъ фароҳамоварда истифода бурда, ҳамчун сармоягузори самти саноат ва истеҳсолот миёни ташкилотҳои қарзии мамлакат хизматрасониҳои худро ба иштирокчиён ва меҳмонон муаррифӣ намуд.
Дар ин Форум тамоми ташкилотҳо, намояндагони корпусҳои дипломатии муқими Тоҷикистон, сармоягузорон, шарикони рушд, сафоратхонаҳо ва соҳибкорону намояндагони корхонаҳои истеҳсолии ватанӣ иштирок намуданд.
Форум ду рӯз давом кард ва тибқи тартиби муқарраргардида рӯзи якуми он вохӯриҳою шиносоӣ бо истеҳсолкунандагон сурат гирифта, вазъи истеҳсолу содирот дар ҷумҳурӣ ва ба ин монанд масъалаҳо баррасӣ гардиданд.
Рӯзи дуюми Форум намоишгоҳи молу маҳсулоти истеҳсоли ватанӣ ва ташкилотҳои қарзие, ки ҳамчун сармоягузори дохилӣ корхонаҳои истеҳсолӣ ва саноату истеҳсолотро маблағгузорӣ менамоянд, бо ташкили гӯшаҳои алоҳида маҳсулоти худро муаррифӣ намуданд.
