Рӯзи 25 феврали соли 2025 дар Вазорати корҳои хориҷӣ нишасти корӣ дар бораи ҷалби сармояи хориҷӣ бо раҳбарии Ҳокими Холиқзода, муовини якуми Сарвазири Тоҷикистон баргузор гардид. Дар ҷаласа Сироҷиддин Муҳриддин, вазири корҳои хориҷӣ, раҳбарияти вазорату идораҳои дахлдори кишвар ширкат намуданд. Раҳбарони намояндагиҳои дипломатии Тоҷикистон дар кишварҳои хориҷӣ тариқи фосилавӣ дар он иштирок карданд.
Сироҷиддин Муҳриддин зимни суханрониаш «сиёсати дарҳои боз»-и Тоҷикистонро омили аслии тақвияти ҳамкориҳои иқтисодии хориҷӣ арзёбӣ кард. Ҳамчунин вазири корҳои хориҷӣ гуфт, «нақши намояндагиҳои дипломатии кишвар дар ростои тақвияти ҳамкориҳои иқтсидӣ ва ҷалби сармояи хориҷӣ назаррас аст».
Муовини Сарвазири кишвар нооромиҳо ва камбуди ғизо дар кишварҳои ҷаҳонро аз мушкилоти муҳими рӯз донист ва дар ин росто иҷрои аҳдофи роҳбурдии Тоҷикистонро муҳим арзёбӣ кард.
Нишасти кории мазкур ҷиҳати ноил шудан ба ҳадафҳои миллӣ, аз ҷумла рушду тавсеаи ҳамкориҳои иқтисодии хориҷӣ ва тақвияти мавқеи Тоҷикистон дар арсаи байналмилалӣ кумак хоҳад кард.
