Дирӯз, 17 июли соли 2025 дар меҳмонхонаи «Hayat Regency»-и Душанбе Форуми иқтисодӣ, сармоягузорӣ ва сайёҳии Ҷумҳурии Тоҷикистон ва Аморати Муттаҳидаи Араб (АМА) баргузор шуд.
Дар Форум раҳбарон ва намояндагони вазорату идораҳои давлатӣ ва зиёда аз 100 ширкату корхонаҳои бахшҳои энержӣ, сайеҳӣ, сохтмон, ҳамлу нақл, лоҷестик, дороиву бонкдории Тоҷикистону АМА ҳузур доштанд.
Завқӣ Завқизода, вазири рушди иқтисод ва савдои кишвар ва Абдулло ибни Тавқ Ал Марри, Вазири иқтисод ва сайёҳии АМА дар ин ҳамоиш ширкат карда ин чорабиниро қадами муҳим дар тавсеаи имкониятҳои сармоягузорӣ ва ҳамкориҳои иқтисодиву тиҷоратии ҳар ду кишвар арзёбӣ намуданд.
Гуфта шуд, дар соли 2024, гардиши савдои дуҷониба байни Тоҷикистон ва АМА ба 91.9 миллион доллари ИМА расид, ки нисбат ба соли 2023 61% бештар аст. Танҳо дар моҳи январ-майи соли 2025, ҳаҷми савдо ба 39.9 миллион доллари ИМА расид, ки 2.1 маротиба бештар нисбат ба ҳамин давраи соли гузашта мебошад.
Дар Форум маросими имзо ва табодули созишномаҳои ҳамкорӣ, аз ҷумла Созишномаи ҳамкорӣ оид ба робитаҳои ҳавой миёни Мақомоти федеролии авиатсияи граждании Амороти Муттаҳидаи Араб ва Агентии авиатсияи граждании назди Ҳукумати Ҷумҳурии Тоҷикистон ва Ёддошти тафоҳуми чортарафа байни Вазорати саноат ва технологияҳои нави Ҷумҳурии Тоҷикистон баргузор гардид.
Дар поёни форум мулоқоти дуҷонибаи соҳибкорони ду кишвар дар формати «Соҳибкор бо Соҳибкор» (В2В) ва «Соҳибкор бо Давлат» баргузор гардиданд.
