Раиси Гурӯҳи дӯстии Парлумони Эрон-Тоҷикистон, аъзои Кумитаи амнияти миллӣ ва сиёсати хориҷии Парлумони Ҷумҳурии Исломии Эрон Ҷалил Раҳимӣ ва ҳамроҳонашон дар доираи сафари корӣ ба Ҷумҳурии Тоҷикистон аз Осорхонаи миллӣ дидан намуданд. Меҳмонон бо шуъбаи табиат, ёдгориҳои даврони “Асри Санг”, “Асри Биринҷ”, “Оини Зардуштӣ”, толорҳои кулолгарӣ ва сиккаҳо, давраҳои “Ҳахоманишиҳо”, “Сосониён”, “Ҳайтолиён” ва намоиши “Тоҷикистон – кишвари дарёҳои тиллоӣ” шинос шуданд. Дар ин бора радиои “Овози тоҷик” дар такя ба Осорхонаи миллии Тоҷикистон хабар медиҳад.
Ба иттилои манбаъ, ҳамзамон, меҳмонон аз намоиши “Пайравони Комолиддин Беҳзод. Миниатюраи тоҷик” дидан намуда, ба ҳунари рассом Камолзода Олим ва шогирдони он баҳои баланд доданд.
Баъд аз анҷоми сайри осорхонавӣ Гурӯҳи дӯстии Парлумони Эрон-Тоҷикистон, аъзои Кумитаи амнияти миллӣ ва сиёсати хориҷии Парлумони Ҷумҳурии Исломии Эрон Ҷалил Раҳимӣ ва ҳамроҳонашон аз тамошои толорҳои намоишӣ изҳори хушҳолӣ намуда, ҳамчун анъана дар китоби қайди таассуроти “Меҳмонони фахрӣ”-и Осорхонаи миллӣ андешаҳояшонро дарҷ намуданд.
Ҳамчунин, дар интиҳои боздид ва қайди таассурот ҳамчун рамзи дӯстӣ ҷонибҳо китобҳо эҳдо намуданд.
