Дастаи мунтахаби футзали Тоҷикистон дар бозии ниҳоии марҳилаи гурӯҳии Ҷоми Осиё-2022 бар дастаи миллии Туркманистон бо ҳисоби 8:5 пирӯз шуд. Даста дар гурӯҳи «В» мақоми дуюмро касб карда, ба даври чаҳорякниҳоӣ баромад. Дар ин бора Федератсияи футболи Тоҷикистон хабар медиҳад.
Дар ҳайати дастаи мунтахаби мо Идрис Ёров 4 гол, Файзалӣ Сардоров ду гол, Муҳаммадҷон Шарипов як гол ва як голи дигарро футболбозони туркман ба дарвозаи дастаашон заданд.
Шогирдони Пайрав Воҳидов дар даври ¼-ниҳоии Ҷоми Осиё-2022 бо ғолиби гурӯҳи «А» — дастаи футзали Таиланд бозӣ мекунанд. Вохӯрии дастаҳо 4 октябр, соати 19:00 бо вақти Душанбе оғоз меёбад.
Дар бозии дигари гурӯҳи «В» дастаи Узбекистон бар дастаи Баҳрайн бо ҳисоби 6:1 ғалаба кард. Ҳарифаш дар чорякфинал дастаи футзали Кувайт мебошад, ки дар гурӯҳи «А» ҷои дуюмро гирифт.
Қобили зикр аст, ки дастаи миллии футзали Тоҷикистон бори охир понздаҳ сол қабл – соли 2007 ба даври чорякниҳоии Ҷоми Осиё роҳ ёфта буд.
