Суди ноҳияи Первомайски Бишкек чанд мансабдори собиқро ба гумони тарҳрезӣ кардани ошӯбҳои оммавӣ боздошт кард. Дар ин бора дафтари матбуоти Суди олии Қирғизистон хабар додааст.
Гуфта мешавад, ки аз ҷумла нисбат ба собиқ Прокурори генералии ҷумҳурӣ Азимбек Бекназаров, узви Комиссияи марказии интихобот ва райъпурсии Қирғизистон Гулнора Ҷурабоева ва вазири корҳои дохилӣ Кенешбек Дуйшебоев чора дар шакли ҳабс татбиқ шудааст.
Илова бар ин, собиқ вакили парлумон Равшан Жээнбеков, судяи Суди конститутсионӣ Клара Сооронқулова ва ваколатдор оид ба ҳуқуқи инсон Асия Сосиқбоева боздошт шуданд. Кормандони полиси кишвар рӯзи 23 октябр беш аз 20 мансабдор, сиёсатмадор, ҳомиёни ҳуқуқи башар ва арбобони ҷамъиятии собиқро бо иттиҳоми тарҳрезии ошӯбҳои оммавӣ боздошт кардаанд.
Гуфта мешавад, ки ҳамаи боздоштшудаҳо қаблан ба интиқоли обанбори Кемпиробод ба ҳайати Узбекистон дар чаҳорчӯби аломатгузории марзи давлатӣ мухолиф буданд.
