15 майи соли ҷорӣ ҳайати баландпояи шаҳри Сямэн бо роҳбарии муовини Раиси шаҳр Чжан Жунлян бо мақсади дар сатҳи баланду хотирмон таҷлил намудани санади таърихӣ ва таҳкими минбаъдаи ҳамкориҳои бародаршаҳрӣ, муносибатҳои дустона ва пойдории робитаҳо байни шаҳрҳои Душанбеи Ҷумҳурии Тоҷикистон ва Сямэни Ҷумҳурии Мардумии Чин, ки 10 сол пур мешавад бо сафари корӣ ба Ҷумҳурии Тоҷикистон ташриф оварданд.
Муовини якуми Раиси шаҳри Душанбе Ҷамшед Табарзода меҳмононро ба ҳузур пазируфтанд. Дар ин бора аз мақомоти иҷроияи ҳокимияти давлати шаҳри Душанбе ба радиои «Овози тоҷик» хабар доданд.
Зимни мулоқоти пурмуҳтаво, ки дар фазои созанда сипарӣ гардид, ҷонибҳо масоили марбут ба таҳким ва рушду тавсеаи минбаъдаи ҳамкориҳои мутақобилан судмандро дар доираи муносибатҳои бародархондагӣ баррасӣ намуданд.
Тавре зикр гардид, 10 июни соли 2013 дар шаҳри Душанбе, Ёддошти тафоҳум дар хусуси паймони бародаршаҳрӣ байни шаҳрҳои Душанбе ва Сямэн ба имзо расида буд.
Дар ин давра байни шаҳрҳо равобити судманди пурмаҳсул ба роҳ монда шуда, ҳамкориҳои дуҷониба самту уфуқҳои нав ба навро касб намудааст.
Дар ҷараёни музокирот ҷонибҳо ба тавсеаи ҳамкориҳо дар самтҳои иқтисодию сармоягузорӣ, фарҳангиву гуманитарӣ ва дигар масъалаҳои мавриди таваҷҷуҳ, аз ҷумла иқтисоди сабз ва рақамӣ таваҷҷуҳи хос зоҳир намуданд.
Дар муносибат ба ин санаи таърихӣ яъне 10 солагии истиқрори робитаҳои бародаршаҳрӣ дар толори Осорхонаи миллии Тоҷикистон намоиши аксҳои марбут ба ифтихори ин санаи фархунда, ки таҷассумгари воқеии муносибатҳои бародархондагии дуҷониба маҳсуб меёбад, ифтитоҳ гардид.
Дар фазои тантанавӣ муовини Раиси шаҳри Душанбе Сиҷоуддин Саломзода ва муовини Раиси шаҳри Сямэн Чжан Жунлян ба намоишгоҳ ҳусни оғоз бахшиданд.
Беш аз 30 адад расмҳои аксбардорону суратгирони маъруфи Ҷумҳурии Мардумии Чин, ки манзарҳои зебои шаҳри Сямэн, дастовардҳои шаҳр тӯли солҳои гуногуни мавҷудият, лаҳзаҳои истироҳату фароғати шаҳрвандон ва дигар паҳлуҳои фаъолияти шаҳриёну шаҳрдорони Сямэнро рӯи навор овардаанд, ба маърази тамошо гузошта шуданд.
Дар маросими ифтитоҳи Намоишгоҳи аксҳо намояндагони ташкилоту муассисаҳои ҷумҳуриявию шаҳрӣ, корпуси дипломатӣ ва созмонҳои байналхалқиву минтақавӣ иштирок намуданд.
Дар доираи сафари корӣ ҳайати шаҳри Сямэн дар баробари дидору мулоқотҳо бо роҳбарияти шаҳри Душанбе ва иштирок дар маросими ифтитоҳи Намоишгоҳи аксҳои марбут ба таърихи 10 соли ҳамкориҳо ва таҷассуми шаҳри Сямэн, ҳамзамон аз маконҳои таърихию сайёҳии пойтахт дидан намуданд.
Меҳмонон ҳамчунин бо фаъолияти як қатор муассисаву корхона ва марказҳои хизматрасонии шаҳр, ба шумули Майдони «Истиқлол» ва Маҷмааи меъмории рамзи «Истиқлол», Маҷмааи «Кохи Наврӯз», Корхонаи муштараки автомобилбарории ҶДММ «Акиа Авесто Автоматив Индастри», Маркази савдои «Меҳргон» ва ғайра шинос шуданд.
Ба ин муносибат имсол дар шаҳри Душанбе ва шаҳри Сямэн, ташкили як қатор чорабиниҳои ҷашниро, дар назар гирифтанд.
Бо ҳамин сафари кории ҳайати баландпояи шаҳри Сямэн бо роҳбарии муовини Раиси шаҳр Чжан Жунлян дар Ҷумҳурии Тоҷикистон ба анҷом расид.
АХБОРИ МОНАНД:
Ҳайати ҳукуматии Тоҷикистон дар Анҷумани тиҷоратии EBRD дар Лондон ширкат варзид
Сафири Тоҷикистон дар Олмон дар сафари шиносоӣ-иттилоотӣ ба Бавария бо Президенти федеролӣ иштирок намуд
Иштироки Саъдӣ Каримзода дар ҷаласаи 7-уми вазирони кишоварзии кишварҳои узви Созмони ҳамкории иқтисодӣ
Тоҷикистону Фаронса роҳандозии мактаби синамонигорон дар соли 2023-ро баррасӣ намуданд
