Раиси Маҷлиси миллии Маҷлиси Олии Ҷумҳурии Тоҷикистон муҳтарам Рустам Эмомалӣ бо Раиси Думаи давлатии Федератсияи Русия муҳтарам Вячеслав Володин суҳбати телефонӣ анҷом дод. Зимни суҳбат онҳо масъалаи баргузории Форуми байналмилалии Иттиҳоди давлатҳо таҳти унвони «Мероси бузург – ояндаи умумӣ»-ро, ки ба 80-солагии Ғалаба дар Ҷанги Бузурги Ватанӣ бахшида шудааст, баррасӣ карданд. Ин чорабинӣ дар охири моҳи апрел таҳти сарпарастии Маҷлиси парлумонии Иттиҳоди Беларус ва Русия дар шаҳри қаҳрамони Волгоград баргузор мегардад. Дар форум намояндагони мақомоти қонунгузории кишварҳои ИДМ, як қатор давлатҳои дӯст, инчунин ҷомеаи илмӣ ва коршиносон иштирок хоҳанд кард. Раиси Думаи давлатӣ ҳайати парлумони Тоҷикистонро барои иштирок дар кори форум даъват намуд. Рустам Эмомалӣ барои таваҷҷуҳи зоҳиршуда изҳори сипос кард.
