16 сентябри соли 2026 дар ҳошияи чорабинии тантанавӣ бахшида ба 35-умин солгарди Истиқлоли давлатии Ҷумҳурии Тоҷикистон, ки бо ташаббуси Сафорати Ҷумҳурии Тоҷикистон дар Салтанати Умон дар шаҳри Масқат баргузор гардид, намоишгоҳи фарҳангӣ ва сайёҳии Ҷумҳурии Тоҷикистон ташкил ва муаррифӣ карда шуд.
Намоишгоҳи мазкур аз ҷониби ҳайати Ҳукумати Салтанати Умон таҳти роҳбарии вазири кишоварзӣ, моҳипарварӣ ва захираҳои оби Салтанати Умон доктор Сауд ибни Ҳамуд ибни Аҳмад Ал-Ҳабсӣ дар якҷоягӣ бо сафири Ҷумҳурии Тоҷикистон дар Салтанати Умон Зубайдулло Зубайдзода расман ифтитоҳ гардид.
Дар намоишгоҳи фарҳангӣ ва сайёҳӣ меҳмонон бо намунаҳои гуногуни фарҳанги миллӣ ва маҳсулоти кишоварзии Тоҷикистон шинос карда шуданд. Аз ҷумла, навъҳои гуногуни меваю тармеваҳои Тоҷикистон, аз қабили ангур, нок, хурмо, шафтолу, лимӯ ва дигар маҳсулоти кишоварзӣ, инчунин хушкмева, анвои кулчаву нонҳои миллӣ, либосҳои суннатии тоҷикӣ ва намунаҳои санъати тасвирӣ ба намоиш гузошта шуданд.
Ҳамчунин, китобҳо, маҷаллаҳо ва маводи иттилоотию сайёҳӣ оид ба Тоҷикистон, инчунин китобҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба меҳмонон муаррифӣ гардиданд.
Намоишгоҳи фарҳангӣ ва сайёҳии Тоҷикистон мавриди таваҷҷуҳи зиёди иштирокчиёни чорабинӣ қарор гирифта, барои шиносоии онҳо бо таъриху фарҳанги бостонӣ, анъанаҳои миллӣ, ҳунарҳои мардумӣ, маҳсулоти кишоварзӣ ва имкониятҳои сайёҳии Тоҷикистон заминаи мусоид фароҳам овард.
Ташкили чунин намоишгоҳҳои фарҳангӣ ва сайёҳӣ дар доираи чорабиниҳои дипломатӣ барои муаррифии шоистаи Тоҷикистон, таҳкими робитаҳои фарҳангӣ ва башардӯстона, густариши ҳамкориҳои иқтисодию тиҷоратӣ ва сайёҳӣ, инчунин таҳкими робитаҳои Сафорат бо мақомоти давлатӣ, корпуси дипломатӣ ва доираҳои гуногуни кишвари иқомат мусоидат менамояд.
АХБОРИ МОНАНД:
Ҳайати ҳукуматии Тоҷикистон дар Анҷумани тиҷоратии EBRD дар Лондон ширкат варзид
Сафири Тоҷикистон дар Олмон дар сафари шиносоӣ-иттилоотӣ ба Бавария бо Президенти федеролӣ иштирок намуд
Иштироки Саъдӣ Каримзода дар ҷаласаи 7-уми вазирони кишоварзии кишварҳои узви Созмони ҳамкории иқтисодӣ
Тоҷикистону Фаронса роҳандозии мактаби синамонигорон дар соли 2023-ро баррасӣ намуданд
