Бо ташаббуси Кумитаи рушди сайёҳии назди Ҳукумати Ҷумҳурии Тоҷикистон ҷиҳати рушди ҳамкориҳои дуҷониба ва тарғиби имкониятҳои сайёҳии кишвар дар арсаи байналмилалӣ ва муаррифии ҷанбаҳои муҳими ташаббусҳои Пешвои миллат оид ба «Даҳсолаи байналмилалии амал «Об барои рушди устувор», солҳои 2018-2028» имрӯз дар Осоишгоҳи Шоҳамбарӣ Форуми байналмилалӣ дар мавзӯи “Тоҷикистон – сарзамини обҳои шифобахш” баргузор гардид. Дар ин бора хабарнигори радиои “Овози тоҷик” Мирсаид Сатториён, ки дар ин чорабинӣ ширкат дорад, иттилоъ дод.
Дар Форуми мазкур намояндагони вазорату идораҳо, сафоратхонаҳои муқими Душанбе, коршиносон ва мутахассисони соҳаи об, ширкатҳои сайёҳии ватанӣ ва ширкатҳои сайёҳии кишварҳои Россия, Қазоқистон ва Ӯзбекистон осоишгоҳҳо ва муассисаҳои таълимии ҷумҳурӣ, ки дар риштаи сайёҳӣ мутахассис омода менамоянд, иштирок доштанд.
Қабл аз оғози кори Форум меҳмонону иштирокдорони чорабинӣ аз намоишгоҳи имкониятҳои сайёҳӣ дидан намуданд.
Ҳамоиши мазкурро Тоҷиддин Ҷуразода, Раиси Кумитаи рушди сайёҳии Ҷумҳурии Тоҷикистон ифтитоҳ намуда, дар бораи имкониятҳои сайёҳии Тоҷикистон маълумот дод.
Зикр шуд, ки маҳз бо талошҳои созандаву бунёдкоронаи Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон захира ва имкониятҳои обиву сайёҳии кишвар ба таври шоиста дар сатҳи байналмилалӣ муаррифӣ ва масъалагузорӣ карда мешаванд.
“Табиати Тоҷикистон бо сабаби гуногунрангӣ ва мавҷудияти кўҳҳову доманакуҳҳо аз якчанд ҷиҳат хос буда, барои руйидани гиёҳҳои шифобахш шароити мусоид фароҳам аст. Захираи зиёди обҳои шифобахш, ки аз замини доманакўҳҳо ба таври табиӣ ё сунъӣ фаввора зада мебароянд, аз ҳисоби сермаъдан будани қабатҳои замини кишвар қобилияти шифобахшӣ дошта, як қатори онҳо нодиртарин дар дунё ба шумор мераванд”,- гуфт Тоҷиддин Ҷуразода.
Бояд гуфт, ки машҳуртарин чашмаҳои шифобахши Тоҷикистон чашмаҳои Хоҷа Оби Гарм, Явроз, Оби Гарм, Шоҳамбарӣ, Гармчашма, Ҳавотоғ, Зумрад, чашмаи Биби Фотимаи Заҳро, Авҷ, Ямчун ва Зонг мебошанд, ки барои барқароркунии саломатии инсон манфиати зиёд доранд.
Ба зикри Тоҷиддин Ҷуразода, марказҳои солимгардонию табобатии кишвари мо хусусиятҳои фавқулодда табобатбахширо доро мебошанд. Онҳо инчунин сохтори такмилёфтаву рушдкарда доранд, ки аз ҳамтоёни хориҷии худ ягон камӣ надоранд. Имрӯзҳо ба ҳамаи минтақаҳои дорои захираҳои сайёҳии табобатию солимгардонӣ, аз ҷумла обҳои минераливу шифобахш, пиряхҳо ва дарёву кӯлҳои мусаффо хатсайрҳои сайёҳӣ ташкил карда шуда, имкониятҳои ин минтақаҳо ба таври васеъ ва самаранок истифода шуда истодааст.
Дар идомаи форум аз ҷониби мутахассисону коршиносони соҳаи об дар мавзӯи обҳои шифобахши кишвар омили ҷалби сайёҳон маърӯзаҳо карда шуд.
Изҳори умед карда шуд, ки истифодаи таҷриба ва донишҳои пешқадам дар соҳаи сайёҳии Россия, Қазоқистон, Ӯзбекистон ва Тоҷикистон ба рушди минбаъдаи ҳамкории башардӯстона ҷиҳати таҳкими робитаҳои муштараки сайёҳӣ дар минтақа мусоидати ҳамаҷониба менамояд.
Ҳамоиши мазкур идома дошта, интизор меравад, ки дар он бо мақсади тақвияти ҳамкориҳо ва ҷалби сайёҳон ба кишварҳои ҳамдигар миёни субъектҳои хизматрасони сайёҳии ватанӣ ва кишварҳои Россия, Қазоқистон ва Ӯзбекистон созишномаҳои ҳамкорӣ имзо хоҳанд шуд.
