Имрӯз дар идомаи кори Форуми байналмилалӣ дар мавзӯи “Тоҷикистон – сарзамини обҳои шифобахш” ба 3 ширкатаи нави сайёҳӣ иҷозатномаи фаъолият дар бозори сайёҳии Тоҷикистон дода шуд. Дар ин хусус Мирсаиди Хайрулло, хабарнигори радиои «Овози тоҷик» аз шаҳри Ҳисор иттилоъ дод.
«Бо мақсади мусоидат дар роҳ ёфтани рақобати озоду солим дар бозори сайёҳии кишвар тибқи тартиби муқарраргардида, имрӯз боз ба 3 ширкати дигари навтаъсис “Баҳор сайёҳат”, “Помир — дарвозаи тиллоӣ” ва “Чимтарға travel” иҷозатнома дода шуд»,-зикр кард зимни супурдани иҷозатномаҳо раиси Кумитаи рушди сайёҳӣ Тоҷиддин Ҷӯразода.
Роҳбарони ширкатҳои сайёҳии навтаъсис дар навбати худ аз дастгириҳои пайвастаи Ҳукумати ҷумҳурӣ изҳори сипос карда, барои рақобати солим бо омодасозии барномаҳои ҷолиб ва хатсайрҳои нави сайёҳӣ барои ҷалби бештари сайёҳон омодагии худро изҳор доштанд.
Бояд гуфт, ки дар заминаи имтиёзҳои дар соҳаи сайёҳӣ пешниҳоднамудаи Ҳукумати мамлакат фаъолияти бахши хусусӣ густариш ёфта, шумораи ширкатҳои сайёҳӣ, меҳмонхонаҳо ва дигар инфрасохтори хизматрасонӣ бахши сайёҳӣ зиёд гардид ва ин тадбирҳо ба рушди деҳот, хусусан устувор гаштани соҳаи сайёҳӣ дар мамлакат таъсири мусбат расонида истодаанд.
