Лиз Трасс, Сарвазири Британияи Кабир истеъфо дод. Вай эълон кард, ки аллакай ба шоҳ Чарлз III дар бораи истеъфоаш хабар додааст. Дар ин бора хабаргузориҳои британӣ навиштаанд.
Ба гуфтаи вай, ба наздикӣ ҳизби «Муҳофизакор» интихоботи нави нафареро, ки ба ҳукумат сарварӣ мекунад, баргузор хоҳад кард. «Ман дар як давраи ноустувории бузурги иқтисодӣ ва байналмилалӣ ба ин мақом омадам. Оилаҳо ва ширкатҳо дар ташвиш буданд, ки чӣ гуна ҳисобҳои худро пардохт кунанд», — гуфтааст Лиз Трасс, ҳамчун далели истеъфои худ.
Вай дар идома ҳадафашро аз омадан ба ин мақом чунин шарҳ додааст: «Ман аз ҷониби Ҳизби «Муҳофизакор» бо мақсади тағйир додани вазъи бади кишвар интихоб шудам. Мо дар бораи пардохтҳои энергетикӣ пешниҳодҳо додему пардохти суғуртаи миллиро коҳиш додем. Мо дидгоҳи худро дар бораи иқтисоди кам-андоз ва босуръат рушдёбанда муайян кардем, ки аз имтиёзҳо истифода хоҳад кард. Аммо, эътироф мекунам, ки бо назардошти вазъият ман рисолатеро, ки аз ҷониби ҳизби «Муҳофизакор» бар уҳдаам гузошта шудааст, иҷро карда наметавонам», — гуфтааст ӯ.
Сарвазир қаблан барои ташаббусҳои худ дар соҳаи андоз мавриди интиқодҳои шадид қарор гирифта буд. Барояш пешниҳод карданд, ки бояд вазири молияашро иваз кунад ва нақшаҳои эълоншудаи буҷаи худро лағв намояд. Маъруфияти «Муҳофизакор»-он дар ҳафтаҳои охир баъди интихоби Трасс ба ин симмат дар Бритониё ба сатҳи рекордӣ поин рафт. Ӯ ҳамагӣ панҷ ҳафта пеш роҳбари ҳизби «Муҳофизакор» ва Сарвазир интихоб шуд.
Баъди ин тасмим Шӯрои олии ҳизб эълон кардааст, ки Трасс то интихоб шудани сарвазири нав дар вазифаи худ мемонад. Аммо, роҳбари ҳизби мухолифи лейбористӣ Сайрус Стармер ин эълонро «аблаҳона» хонда, фавран интихоботи умумиро талаб кард. Ба ин талаб роҳбарони ҳизбҳои либералӣ-демократӣ ва миллии Шотландия низ ҳамроҳ шуданд. Лиз Трасс дар посух ба ин вокунишҳо гуфт, «Муҳофизакор»-он дар давоми як ҳафта раҳбари нави худро интихоб хоҳанд кард.
Лиз Трасс ҳамагӣ 45 рӯз дар сари қудрат буд, ки ин кӯтоҳтарин вақт дар таърих барои сарвазири Британия аст. Яъне, ӯ рекорди кӯтоҳтарин дар вазифаи сарвазириро шикаст. Пеш аз ӯ, кӯтоҳтарин сарвазир Ҷорҷ Каннинг буд, ки то маргаш дар соли 1827 ҳамагӣ 119 рӯз дар ин мақом кор кард.
Гуфта мешавад, ки яке аз муддаиёни ин курсӣ Борис Ҷонсон аст, ки қаблан аз ин мақом истеъфо дода буд ва Трасс ҷойгузини ӯ гашт.
