Сафорати Ҷумҳурии Тоҷикистон дар Малайзия дар 6-умин Саммити байналмилалии тиҷоратии Селангор 2022 ширкат намуда, маҳсулоти Тоҷикистонро дар 8-умин Намоишгоҳи байналмилалии Селангор 2022 таҳти унвони «Баъд аз фардо» муаррифӣ намуд. Дар ин бора Вазорати корҳои хориҷии Ҷумҳурии Тоҷикистон хабар медиҳад.
Дар ҳамкорӣ бо Палатаи савдо ва саноати Ҷумҳурии Тоҷикистон дар чорабинӣ маводи ғизоӣ ва нӯшокиҳои табиии истеҳсолкунандагони ватанӣ аз қабили «Сиёма», «Оби Файзобод», «Амирӣ», «Витаминҳои Тоҷикистон», «Тути Помир» ва ғайра ба намоиш гузошта шуд. Имсол дар намоишгоҳ намояндагони ширкатҳои “Амирӣ”, “Оби Файзобод” ва дигар соҳибкорони тоҷик ширкат варзида, бо харидорони дохиливу хориҷии Малайзия мулоқотҳо анҷом доданд.
8-умин Намоишгоҳи Байналмилалии Селангор (F&B) 2022 намоишгоҳи маҳсулоти хӯрокворӣ ва нӯшокӣ мебошад, ки ҳамасола саноати ғизоро таннавуъ бахшида, барои ба роҳ мондани ҳамкориҳо байни ширкатҳо ва истеҳсолкунандагон як платформаи глобалӣ эҷод мекунад.
