Дар доираи сафараи давлатии Президенти Ҷумҳурии Озарбойҷон ба Тоҷикистон имрӯз дар шаҳри Душанбе Форуми сармоягузории Тоҷикистону Озарбойҷон доир мегардад. Дар он беш аз 150 нафар иштирокчӣ аз ҳарду ҷониб, аз ҷумла роҳбарон ва масъулони вазорату идораҳо ва соҳибкорону сармоягузорон ва намояндагони ширкату корхонаҳои соҳаҳои гуногуни фаъолияти хоҷагидории Тоҷикистону Озарбойҷон иштирок менамоянд. Дар ин бора аз Кумитаи давлатии сармоягузорӣ ва идораи амволи давлатии Ҷумҳурии Тоҷикистон ба мухбири радиои «Овози тоҷик» Абдуфаттоҳи Абдурауф хабар доданд
Дар форуми мазкур масъалаҳои рушди ҳамкориҳо дар соҳаҳои саноат, нақлиёт, коммуникатсия, хӯрокворӣ, сайёҳӣ ва дигар самтҳои муҳим барои ҳар ду кишвар мавриди таҳлилу баррасӣ қарор дода мешаванд.
Иштирокчиён имконият пайдо менамоянд, ки соҳаҳои сайёҳӣ, саноат, энергетика, хизматрасонӣ ва амсоли инҳоро ба ҳамтоёни худ муаррифӣ намоянд. Ҳамзамон, дар доираи чорабинии мазкур байни субъектҳои бахши давлатию хусусии ду давлат санадҳои нави ҳамкорӣ ба имзо расонида мешаванд.
Ҳадаф аз баргузории Форуми мазкур пайдо намудани имкониятҳои сармоягузорӣ дар соҳаҳои саноат, энергетика, сайёҳӣ, нақлиёт ва рушди содирот мебошад.
