Имрӯз — 22 май маросими қуръакашии мусобиқаи Ulaanbaatar Grand Slam 2023 баргузор шуд.
Тибқи иттилои сомонаи расмии Федератсияи байналмилалии ҷудо (IJF) дар мусобиқа 345 варзишгар (183 мард, 162 зан) аз 44 давлати ҷаҳон ширкат менамоянд. Ҷумҳурии Тоҷикистонро дар ин мусобиқа 6 варзишгар миёни мардон намояндагӣ мекунанд.
Гранд Слами Уланбатор фардо – 23 июн бо қувваозмоиҳо дар вазнҳои -60кг, -66кг миёни мардон, -48кг, -52кг, -57кг миёни бонувон оғоз мегардад. 24 июн мардҳо дар вазнҳои -73кг, -81кг, бонувон дар вазнҳои -63кг, -70кг, 25 июн мардҳо дар вазнҳои -90кг, -100кг, +100кг, бонувон дар вазнҳои -78кг, +78кг сабқат мекунанд.
Дар рӯзи якуми мусобиқа 3 варзишгари мо дар вазни -60кг Муҳаммадсолеҳ Қуватов, Меҳрзод Суфиев, дар вазни -66кг Обид Ҷебов гӯштин мегиранд. Рӯзи дуюм дар вазни -73кг Беҳрӯз Хоҷазода, рӯзи сеюм Комроншоҳ Устопириён дар вазни -90кг ва Мансур Раҳмон дар вазни +100кг барои ба даст овардани ҷойҳои ифтихорӣ талош мекунанд.
Фонди умумии ҷоизаҳо 154000 евроро ташкил медиҳад. Ғолибон дар ҳамаи 14 вазн 5000 евро, барандагони медали нуқра 3000 евро ва медали биринҷӣ 1500 евро ҷоизапулӣ дарёфт мекунанд. Ҳамчунин, аз Гранд Слами Уланбатор сар карда, дар радабандии олимпӣ холшумории садфоиза шуруъ мешавад. То ин вақт 50 фоизи холҳои варзишгарон ҳисоб карда мешуд.
Ҳамин тариқ, варзишгарон як соли дигар – то 25 июни соли 2024 имкон доранд барои ба даст овардани роҳхати Бозиҳои олимпии Париж-2024 талош кунанд. Дар асоси радабандии олимпӣ аз 25 июни соли 2024 дар ҳар вазн 18 нафар, бо дарназардошти як варзишгар аз як давлат, соҳиби роҳхати олимпӣ мешаванд.
Рақибони ҷудокорони тоҷик дар мусобиқаи Ulaanbaatar Grand Slam 2023:
Вазни 60 кг
Даври 1
Меҳрзод Суфиев (Тоҷикистон) – Боуда Ромарик (Фаронса)
Муҳаммадсолеҳ Қувватов (Тоҷикистон) – Неил Макдоналд (Британияи Кабир)
Вазни 66 кг
Даври 1
Обид Ҷебов (Тоҷикистон) – Ченг Йен-Минг (Кореяи Ҷанубӣ)
Вазни -73 кг
Даври 2
Беҳрӯз Хоҷазода (Тоҷикистон) – Руслан Ҳалавачоу (IJF) / Ли Вон Ҳи (Кореяи Ҷанубӣ)
Вазни -90 кг
Даври 2
Комроншоҳи Устопириён (Тоҷикистон) — Арам Григориан (АМА) / Айан Байгази ( Қазоқистон)
Вазни +100 кг
Даври 1
Мансур Раҳмон (Тоҷикистон) — Одил Оразбайев (Қазоқистон)
Ёдовар мешавем, ки пагоҳ рақобатҳо соати 08:00 оғоз мешаванд. Рақобатҳои финалӣ соати 14:00 доир мегарданд. Телевизиони “Варзиш” мусобиқаро ба таври мустақим манзури ҳаводорон мегардонад.
АХБОРИ МОНАНД:
Иштироки ҳайати Тоҷикистон дар Форуми байналмилалии волонтёрони Осиёи Марказӣ
«Бехатарии обӣ – асоси рушди устувор»- таҳти ин унвон дар Душанбе Конференсияи байналмилалии илмӣ-амалӣ доир мешавад
КТР барои қабули овозхонон ва мутрибон озмун эълон менамояд
То ба имрӯз дар ҷумҳурӣ 9500 тонна пахта ҷамъоварӣ гардид. Имсол ҳосили он ба 425000 тонна расонида мешавад
