Туркия Исроилга элчи тайинлади
Туркия Президенти Режеп Таййип Эрдоған Шокир Ўзкан Торунларни Исроилга элчи қилиб тайинлади, шу ҳақдаги фармон пайшанба куни имзолангани айтилмоқда.
Торунлар бундан аввал Туркиянинг Фаластиндаги элчиси эди.
Аввалроқ Туркия ташқи ишлар вазири Мавлуд Човушўғли Туркия Исроил билан дипломатик муносабатларни тиклагандан кейин ушбу мамлакатда ўз элчисини тайинлашга қарор қилди, деб баёнот берган эди.
Исроил билан Туркия муносабатлари 2010 йилда исроиллик махсус хизматчилар томонидан Туркиядан Ғазо секторига жўнаган “Мовий Мармара” кемаси эгаллаб олингандан кейин узилган эди. 2018 йилда Анқара Ғазо секторида Исроилнинг ташкил топганига 70 йил тўлиши билан боғлиқ юбилей ҳамда АҚШ Тель-Авивдаги элчихонасини Қуддус шаҳрига кўчириши шароитида бўлиб ўтган норозилик чиқишлардан кейин Анқара Исроилнинг Туркиядаги элчисига мамлакатни тарк этишни таклиф қилди. Ўшанда намойишчилар билан полициячилар тўқнашувларида 59 нафар фаластинлик қурбон бўлган эди.