Эфиопия ҳукумати билан келишув доирасида Тиграй исёнчилари қуролларини топширади
“Тиграйни озод қилиш халқ фронти” исёнчилари Эфиопия билан ўт очишни тўхтатиш бўйича имзоланган келишув доирасида қуролларини топшириши керак, деб ёзмоқда Ассошиэйтед Пресс агентлиги битим нусхасига таяниб.
Аввалроқ Эфиопия ҳукумати ва Тиграй исёнчилари ўртасида ўт очишни тўхтатиш бўйича битим имзолангани маълум қилинган эди. Эфиопия бош вазири Абий Ахмад Али мазкур битимни ислоҳотларни илгари суриш учун улкан аҳамиятга эга, деган эди.
Битимга кўра, Тиграй исёнчилари 30 кун ичида қуролсизланиши керак. Таъкидланишича, Эфиопия федерал хавфсизлик кучлари барча федерал муассасалар, объектлар ва муҳим инфратузилмалар, жумладан, аэропорт ва катта йўлларни назоратга олади.
Мазкур битим Африка иттифоқи шафелигида Жанубий Африка пойтахти Преторияда имзоланган.
Эфиопия шимолида қуролли можаро 2020 йил ноябрда бошланган эди. Ўшанда мамлакат ҳукумати қарийб 30 йилдан буён Эфиопия сиёсий ҳаётида катта таъсирга эга бўлиб келган «Тиграй халқ озодлик фронти”ни ҳарбий базага ҳужум қилганликда айблаб, уларга қарши ҳарбий амалиётларни бошлаб юборди. 2021 йил июнь ойида Тиграй исёнчилари мазкур ҳудуднинг маъмурий маркази бўлган Мэкэле шаҳрини эгаллаб олди. Ҳукумат эса ўт очишни тўхтатиш ҳақида эълон қилди. Кейинроқ томонлар яна қуролли қарама-қаршиликни бошлаб юборди.
Кейинги ярашувга 2022 йил мартда эришилган эди. Орадан беш ой ўтгандан кейин август ойида ҳарбий ҳаракатлар яна бошланиб кетди.