ЖЧ-2022: Роналду ғолиб ким бўлиши ҳақида ўз фикрини билдирди
Португалия терма жамоаси ҳужумчиси Криштиану Роналду Қатарда бўлиб ўтаётган ЖЧ-2022 ғолиби ким бўлиши ҳақида ўз фикрини билдирди. «Ўйлашимча, ҳозир Франция ғолиблик учун асосий даъвогар ҳисобланади, бу ҳақда турнир бошланишидан олдин ҳам айтгандим.
Шунингдек, Мбаппе ушбу чемпионатнинг энг яхши ўйинчиси бўлади», – дея келтиради Роналдунинг сўзларини Mirror нашри. Португалиялик юлдуз ЖЧ-2022 да иштирок этган Англия терма жамоаси ўйини ҳақида ҳам фикрлари биланўртоқлашган.
«Шуни ҳам унутмангки, Англия Франция билан бўлиб ўтган учрашувда жуда яхши ўйин намойиш қилди. Менинг фикримча, Англия билан ҳам худди Бразилия билан бўлган воқеа такрорланди. Англия жуда яхши ўйнади, лекин энг сўнггида қандайдир майда хатолар ўйин якунига таъсир қилди. Шундай бўлсада, барибир инглизлар жаҳон чемпионатида кўрсатган ўйинлари билан фахрланиши керак», – дея қўшимча қилган португалиялик ҳужумчи. Кеча ЖЧ-2022 нинг ярим финали доирасида Аргентина терма жамоаси Хорватия устидан йирик ҳисоб билан ғалаба қозонди. Аргентиналиклар энди бугун бўлиб ўтадиган Франция ва Марокаш учрашуви ғолиби билан финалда кўришади.