Тожикистон ва Россия ўртасидаги 9 – минтақалараро ҳамкорлик конференцияси иш бошлади
Душанбеда “Россия ва Тожикистон ўртасидаги савдо ва сармоявий шериклик” номли минтақалараро ҳамкорликнинг 9 – конференцияси ўз ишини бошлади. Бу ерда Тожикистон ва Россиянинг иқтисодий фаолиятнинг турли соҳаларида фаолият юритувчи 800 дан ортиқ компания ва корхоналар вакиллари, жумладан вазирлик ва идоралар раҳбарлари, вилоят ҳокимиятлари раҳбарлари, тўқимачилик саноати, машинасозлик, транспорт-коммуникация, техника саноати, қишлоқ хўжалиги, соғлиқни сақлаш, молиявий хизматлар ва туризм ва бошқа давлат ва хусусий корхоналар жалб этилган, деб хабар берди “Овози тожик” радиоси мухбири Мўътабар Носирова.
Мазкур анжуман Тожикистон ва Россия ўртасидаги ҳамкорликни кенгайтиришга хизмат қилмоқда. Анжуманнинг панел сессиялари саноат кооперацияси, энергетика, экология, транспорт ва логистика, шунингдек, фан, таълим ва гуманитар соҳаларда Россия-Тожикистон ҳамкорлиги мавзуларига бағишланади.
Конференция икки кун давом этади, иккинчи куни В2В шаклида ишлаб чиқариш йиғилишлари ва Россия-Тожикистон тадбиркорлар кенгаши йиғилиши бўлиб ўтади.
Натижада икки давлат вакиллари ўртасида 20 га яқин ҳамкорлик ҳужжати имзоланиши кутилмоқда.