25 июл дар шаҳри Рими Италия Чемпионати ҷаҳон оид ба гуштин миёни наврасони то 17-сола оғоз шуд, ки то 31 июл идома меёбад. Дар он 597 варзишгар аз 54 давлат иштирок доранд. Дар ин бора радиои “Овози тоҷик” дар такя ба Кумитаи милли олимпии кишвар хабар медиҳад.
Ба иттилои манбаъ, ҷумҳурии моро дар ин мусобиқа 2 нафар – Алиризо Баҳромов (71кг) ва Муҳаммадамин Абдуллоев (80кг) дар гуштини тарзи озод ба Италия сафарбар гардиданд.
Қувваозмоиҳо 25 июл бо гуштини юнонӣ-римӣ оғоз гардида, 29 июл бо гуштини тарзи озод идома меёбад ва 31 июл ба анҷом мерасад. Дар асоси барномаи чемпионат Муҳаммадамин 29-30 июл ва Алиризо 30-31 июл гуштин мегиранд. Рӯзи аввал марҳилаи интихобӣ ва рӯзи дуюм финал ба нақша гирифта шудааст.
Ёдовар мешавем, ки моҳи июн дар Чемпионати Осиё оид ба гуштин миёни наврасони то 17-сола дар Бишкеки Қирғизистон Муҳаммадамин Абдуллоев ва дар Чемпионати Осиё миёни наврасони то 15-сола дар Манамаи Баҳрайн Алиризо Баҳромов сазовори медали нуқра шуда буданд.
Дар чемпионатҳои ҷаҳон оид ба гуштин миёни наврасон Тоҷикистон ҳамагӣ ду медал – 1 нуқра ва 1 биринҷӣ – дорад. Дар Чемпионати ҷаҳон оид ба гуштин миёни наврасон соли 2019 дар Софияи Булғористон дар равияи гуштини юнонӣ-римӣ Шероз Очилов дар вазни 65кг медали нуқра ва Фирӯз Мирзораҷабов дар вазни 55кг медали биринҷӣ ба даст овардаанд.
