Дирӯз дар Варзишгоҳи шаҳри Қунияи Туркия маросими ифтитоҳи Бозиҳои 5-уми ҳамбастагии исломӣ баргузор шуд, ки дар он ҳайати олимпии Тоҷикистон низ иштирок намуд.
Тибқи иттилои Кумитаи миллии олимпии кишвар, Парчами Тоҷикистонро дар маросими кушодашавии Бозиҳои 5-уми ҳамбастагии исломӣ Раҳмонҷон Маҳмадбеков (гӯштини тарзи озод) ва Муниса Ойматова (таэквондо) ба варзишгоҳ ворид намуданд.
Ба иттилои манбаъ, дар мусобиқа 4200 нафар варзишгарон аз 56 кишвари ҷаҳон ширкат мекунанд. Ҷумҳурии Тоҷикистонро дар он 48 нафар варзишгар муаррифӣ доранд.
Дар маросими ифтитоҳи Бозиҳои 5-уми ҳамбастагии исломӣ вазири ҷавонон ва варзиши Ҷумҳурии Туркия Меҳмет Муҳаррам Касапоғлу, дабири кулли Созмони ҳамкории исломӣ Ҳусейн Иброҳим Таҳа, раиси Федератсияи варзишии ҳамбастагии исломӣ, шоҳзода Абдулазиз Туркӣ Ал-Файсал Ал-Сауд суханронӣ карданд.
Президенти Туркия Раҷаб Тайиб Эрдуғон Бозиҳои 5-уми ҳамбастагии исломиро ифтитоҳ намуда, ба ҳамаи иштирокчиён муваффақият хост.
