Масъалаи ҷудо кардани замин барои сохтмони маркази фарҳангии тоҷикон дар Екатеринбург зимни мулоқоти Давлатшоҳ Гулмамадзода, сафири Ҷумҳурии Тоҷикистон дар Федератсияи Россия бо роҳбари шаҳри Екатеринбург Алексей Орлов муҳокима шуд.
Тавре радиои “Овози тоҷик” дар такя ба Вазорати корҳои хориҷии Ҷумҳурии Тоҷикистон хабар медиҳад, роҳбари Намояндагии дипломатии Тоҷикистон барои густариши ҳамкориҳо дар соҳаи маориф ва омода намудани мутахассисон аз рӯи ихтисосҳои коргарӣ, ҳамкориҳои ҳамаҷонибаи тиҷоративу иқтисодӣ, инчунин ҷалби сайёҳон ва табодули фарҳангӣ изҳори ҳавасмандӣ намуд.
Ҷонибҳо масъалаҳои муҳими рушди ҳамкориҳои тиҷоративу иқтисодии минтақаҳои Тоҷикистон бо вилояти Свердловск баррасӣ намуда, доираҳои соҳибкорӣ барои иштирок дар Форуми сармоягузории Тоҷикистон-Россия, ки моҳи сентябри соли 2022 дар шаҳри Душанбе даъват шуданд.
Ҳамчунин, Давлатшоҳ Гулмамадзода бо Ректори “Донишгоҳи давлатии иқтисодии Урал” Яков Силин ва ректори “Донишгоҳи федералии Урал ба номи Президенти нахустини Россия Б.Н. Ельцин” Виктор Кокшаров мулоқот анҷом дод, ки зимни он табодули афкор дар мавриди омода кардани мутахассисони баландихтисоси соҳаи иқтисод дар бахши саноат, ҳамчунин ба густариши ҳамкориҳо дар бахшҳои илму маориф миёни мактабҳои олии Тоҷикистон ва “Донишгоҳи давлатии иқтисодии шаҳри Урал” таваҷҷуҳ зоҳир намуданд.
Сафири Ҷумҳурии Тоҷикистон дар Федератсияи Россия дар доираи сафари кории худ ба шаҳри Екатеринбург ба ифтихори Рӯзи Истиқлолияти давлатии Ҷумҳурии Тоҷикистон ва таҷлили 30-солагии Иҷлосияи XVI Шӯрои Олии Ҷумҳурии Тоҷикистон, бо ҳамватанони муқими минтақаҳои ҳавзаи федералии Урали Россия бо донишҷӯёни тоҷики мактабҳои олии Екатеринбург, инчунин ҳамватанони муқими минтақаҳои ҳавзаи федералии Урали Россия мулоқот кард.
