“Вазъи илм ва маориф дар шароити истиқлоли давлатӣ”- таҳти ин унвон имрӯз дар шаҳри Душанбе конфронси илмӣ-амалии ҷумҳуриявӣ доир гардид. Дар он олимону коршиносон, устодон ва кормандони вазорати маориф иштирок намуданд.
Бино ба иттилои хабарнигори радиои “Овози тоҷик” Зарангези Маҳмадулло, ки дар ин ҳамоиш ҳузур дорад, чорабиниро Усмонзода Хайриддин, раиси Маркази тадқиқоти стратегии назди Президенти Ҷумҳурии Тоҷикистон ифтитоҳ намуда, зимни суханронӣ оид ба дастовардҳои назаррас, ки дар солҳои соҳибистиқлоии кишвар дар самти маориф ба даст омаданд, ибрози назар кард. Номбурда муваффақиятҳои соҳаи маорифро мусбат арзёбӣ намуда, таъкид дошт, ки дар ҷумҳурӣ беш аз 260 мактаби нав сохта мавриди истифода қарор гирифт.
Дар давоми конфронс аз ҷониби иштирокчиён доир ба масъалаҳои татбиқи сиёсати давлатӣ дар соҳаи илм ва низоми идоракунии он, вазъи тарбияи кадрҳои илмӣ, таҳсилоти бисёрзинагӣ дар кишвар, ҳифзи моликияти зеҳнӣ дар кишвар, таҷрибаи ҷаҳонии низоми таҳсилот ва идоракунии соҳаи илму маориф ибрози назар карда шуд.
