Дар 16-умин Намоишгоҳи байналмилалии сайёҳӣ, гардишгарӣ ва меҳмондорӣ — TITE 2023 — и Ҷумҳурии Исломии Эрон, ки аз 7 то 10-уми феврали соли ҷорӣ дар шаҳри Теҳрон ҷараён дорад, масъулини Кумитаи рушди сайёҳии назди Ҳукумати Ҷумҳурии Тоҷикистон, намояндагони бахши хусусӣ ва ширкатҳои сайёҳии кишвар иштирок намуда истодаанд. Дар ин бора Бахтовар Аминзода, роҳбари ҶДММ “Шумон тур” ба Мирсаид Сатториён, мухбири радиои “Овози тоҷик” иттилоъ дод.
Мавсуф зикр кард, ки дар ин Намоишгоҳ дар баробари дигар кишварҳои олам имкониятҳои сайёҳии Ҷумҳурии Тоҷикистонро 7 ширкати ватанӣ ба иштирокчиён ва меҳмонони ин Платформаи бузурги сайёҳӣ муаррифӣ намуда истодаанд.
«Намоишгоҳи байналмилалии сайёҳӣ, гардишгарӣ ва меҳмондорӣ — TITE 2023 чорабинии расмӣ буда, аз ҷониби ҳукумати Ҷумҳурии Исломии Эрон дастгирӣ меёбад. Он ҳамасола дар шаҳри Теҳрон баргузор мешавад. Дар маросими ифтитоҳи намоишгоҳ дар баробари вазирони Африқои Ҷанубӣ, Лубнон, Зимбабве, Ироқ, Словакия, Туркия, Швейтсария, Уммон, Покистон, Арманистон, Русия, Қазокистон, Узбекистон; сафирон ва дипломатҳо ва масъулони мақомоти Эрону фаъолони гардишгарӣ намояндагони Ҷумҳурии Тоҷикистон низ иштироки фаъолона доранд. ва бо экспозицияхои якчоя намоиш дода шудаанд», — иттилоъ дод Бахтовар Аминзода, аз қавли Фарҳод Аминиён, котиби намоишгоҳ.
Гуфта шуд, ки имсол теъдоди кишварҳои ширкаткунандаи намоишгоҳ афзуда, Ҷумҳурии Тоҷикистон дар намоишгоҳ бо стенди мавзӯӣ муаррифӣ карда мешавад, ки дар он мутахассисони Кумитаи рушди сайёҳӣ дар якҷоягӣ бо ширкатҳои сайёҳии ватанӣ дар бораи доираи васеи имкониятҳои сайёҳӣ дар кишвар бо масъулини гардишгарӣ ва ширкатҳои сайёҳии кишварҳои иштирокчӣ муколама мекунанд. Дар ин чор рӯз намояндагони кишвари мо дар ҳамоишҳо баромад ва дар конферонсҳои панелӣ ширкат мекунанд. Инчунин, ҳайати Ҷумҳурии Тоҷикистон бо роҳбарони созмонҳои гардишгарии Эрон мулоқоти корӣ доир намуда, дар доираи он созишномаҳои ҳамкорӣ имзо мекунанд.
Лайло Аждарӣ, мудири кулли дафтари бозорёбӣ ва тавсеаи гардишгарии хориҷии Вазорати фарҳанг ва сайёҳии Эрон зимни суҳбати катбӣ бо радиои “Овози тоҷик” гуфт, моҳи ноябри соли 2022 масъулони соҳаи гардишгарии Эрон ҳамроҳ бо як гуруҳ аз роҳбарони ширкатҳои соҳавӣ ба Ҷумҳурии Тоҷикистон барои рушду тавсеаи соҳа сафар доштанд ва дар заминаи мулоқотҳо дар Кумитаи рушди сайёҳии назди Ҳукумати Ҷумҳурии Тоҷикистон аз имконот ва зарфияти Тоҷикистон дар соҳаи гардишгарӣ маълумот пайдо карда, аз истиқболи гарму самимии тоҷикон, зебоиҳои мафтункунандаи “Кохи Наврӯз” ва толорҳои муҳташами он ҳайратзада шудем.
«Бисёр хурсандам, ки осорхонаи зебои миллии Тоҷикистонро дидам. Ин осорхона яке аз зеботарин осорхонаҳои дунё аст, ки ман то ба ҳол дидаам. Ба унвони як эронӣ бо ҳамтаборони тоҷики худ ифтихор мекунам, ки аз осор ва тамаддуни бузурги муштаракамон ҳифозат карда, онро муаррифӣ менамоянд. Акнун намояндагони ширкатҳои сайёҳии Тоҷикистон ин ҷо омаданд, то ҳам имкониятҳояшонро барои мо муаррифии бештар кунанд ва ҳам бо шарокати бештари мо созишнома имзо кунанд, то оянда тавонем бидуни кадом мушкил ба кишварҳои ҳамдигар равуо кунем”, — гуфт хонум Аждарӣ.
Ёдовар мешавем, ки 18-уми сентябри соли 2021 дар ҷараёни сафари расмии Президенти Ҷумҳурии Исломии Эрон Сайид Иброҳими Раисӣ ба Ҷумҳурии Тоҷикистон Ёддошти тафоҳум байни Ҳукумати Тоҷикистон ва Ҳукумати Эрон оид ба ҳамкорӣ дар соҳаи сайёҳӣ имзо шуда буд. Ҳамзамон, 30-юми майи соли 2022 Барномаи ҳамкорӣ байни Кумитаи рушди сайёҳии назди Ҳукумати Ҷумҳурии Тоҷикистон ва Вазорати мероси фарҳангӣ, гаршдишгарӣ ва саноеи дастии Ҷумҳурии Исломии Эрон қабул шуд.
