Вазири рушди иқтисод ва савдо бо Сафири навтаъини Ҷумҳурии Мардумии Чин дар Ҷумҳурии Тоҷикистон вохӯрӣ намуд
18 августи соли 2025 вохӯрии Вазири рушди иқтисод ва савдои Ҷумҳурии Тоҷикистон Завқизода Завқӣ Амин бо Сафири навтаъини Ҷумҳурии Мардумии Чин дар Ҷумҳурии Тоҷикистон ҷаноби Го Жиҷун баргузор гардид, ки дар доираи он тавсеа ва рушди минбаъдаи ҳамкориҳои тиҷоративу иқтисодӣ миёни ду кишвар мавриди баррасӣ қарор гирифт.
Завқизода З. А. Го Жиҷунро ба муносибати ба вазифаи Сафири Ҷумҳурии Мардумии Чин дар Ҷумҳурии Тоҷикистон таъин шуданаш табрик карда, ба ӯ муваффақиятҳо орзу намуд.
Завқизода З. А. қайд намуд, ки бо шарофати сиёсати хирадмандонаи роҳбарони ду кишвар Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва Раиси Ҷумҳурии Мардумии Чин муҳтарам Си Ҷинпин ҳамкориҳои стратегии ду кишвар мунтазам рушд карда, ба сатҳи сифатан нав баромаданд.
Дар натиҷа дар нимсолаи якуми соли 2025 гардиши савдои дуҷониба 37 фоиз рушд карда, 1,2 миллиард долларро ташкил дод.
Ҳамзамон бо мақсади пайгирии дастуру супоришҳои Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ҷиҳати ҷалби бештари сармояи Хитой аз ҷониби вазир масъалаи оғози татбиқи 13 лоиҳаи афзалиятнок мавриди пайгирӣ қарор гирифт.
Дар анҷоми вохӯрӣ ҷонибҳо омодагии худро барои густариши ҳамкориҳои иқтисодӣ ва татбиқи саривақтии лоиҳаҳои қайдгардида изҳор намуданд.
