8 сентябри соли 2026, дар шаҳри Токио бо ташаббуси Сафорати Ҷумҳурии Тоҷикистон дар Ҷопон чорабинии тантанавӣ бахшида ба 35-умин солгарди Истиқлоли давлатии Ҷумҳурии Тоҷикистон баргузор гардид.
Дар чорабинӣ намояндагони расмии Ҳукумати Ҷопон, вакилони Парлумон, роҳбарони намояндагиҳо дипломатӣ, намояндагони доираҳои сиёсӣ, иқтисодӣ, тиҷоратӣ ва фарҳангии Ҷопон, инчунин ҳамватанони муқими Ҷопон иштирок намуданд.
Маросим бо иҷрои Сурудҳои миллии Ҷумҳурии Тоҷикистон ва Ҷопон аз ҷониби хонандагони мактаби Согои Музофоти Канагава (Kanagawa Prefectural Kanagawa Sogo High School) оғоз гардид.
Сафири Ҷумҳурии Тоҷикистон дар Ҷопон Фарҳод Салим ҳозиринро хайрамақдам гуфта, оид ба дастовардҳои назарраси Ҳукумати Ҷумҳурии Тоҷикистон таҳти роҳбарии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар соҳаҳои сиёсӣ, иҷтимоию иқтисодӣ ва фарҳангӣ ёдовар шуд. Таъкид гардид, ки дар давоми 35 соли истиқлол Тоҷикистон дар таҳкими сулҳу субот ва ваҳдати миллӣ, рушди иқтисодию иҷтимоӣ, таҳкими давлатдорӣ ва баланд бардоштани мақоми байналмилалии кишвар ба дастовардҳои назаррас ноил гардидааст.
Дар идомаи чорабинӣ муовини парлумонии вазири корҳои хориҷии Ҷопон ҷаноби Ониши Ёҳей аз номи Ҳукумати Ҷопон мардуми Тоҷикистонро ба муносибати 35-умин солгарди Истиқлоли давлатӣ самимона табрик намуда, рушди муносибатҳои Тоҷикистону Ҷопонро дар соҳаҳои сиёсӣ, ҳамкории иқтисодӣ ва рушди захираҳои инсонӣ мусбат арзёбӣ кард.
Сипас ҷаноби Тсуҷи Киото, узви Гурӯҳи дӯстӣ ва ҳамкории байнипарлумонии Тоҷикистону Ҷопон ва Вазири давлатии муҳити зисти Ҷопон, суханронӣ намуда, ба муносибати 35-умин солгарди Истиқлоли Тоҷикистон табрик гуфт.
Ҷаноби Тсуҷи ба зарфияти васеи ҳамкории ду кишвар дар масъалаҳои рушди устувор, иқтисоди устувор, энергетика, захираҳои муҳими стратегӣ ва ҳифзи муҳити зист ишора намуда, омодагии худро ҳамчун узви Лигаи дӯстии парламентии ду кишвар барои идомаи саҳмгузорӣ дар таҳкими робитаҳои байни Тоҷикистону Ҷопон ва мардумони ду кишвар баён намуд.
Дар ҳошияи чорабинӣ Сафорат гӯшаи фарҳангӣ-сайёҳӣ ташкил намуд, ки дар он асбобҳои мусиқии миллӣ, либосҳои тоҷикӣ, намунаҳои санъати тасвирӣ, маҷаллаҳо ва маводи сайёҳӣ, инчунин китобҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба меҳмонон муаррифӣ гардиданд.
Барномаи фарҳангӣ бо иҷрои рақси миллии тоҷикӣ аз ҷониби гулдухтарони гурӯҳи фарҳангии ҷопонии «Гулистон» идома ёфта, ба меҳмонон таомҳои миллии тоҷикӣ пешниҳод гардид.
АХБОРИ МОНАНД:
Ҳайати ҳукуматии Тоҷикистон дар Анҷумани тиҷоратии EBRD дар Лондон ширкат варзид
Сафири Тоҷикистон дар Олмон дар сафари шиносоӣ-иттилоотӣ ба Бавария бо Президенти федеролӣ иштирок намуд
Иштироки Саъдӣ Каримзода дар ҷаласаи 7-уми вазирони кишоварзии кишварҳои узви Созмони ҳамкории иқтисодӣ
Тоҷикистону Фаронса роҳандозии мактаби синамонигорон дар соли 2023-ро баррасӣ намуданд
