Хитойда чеклов чоралари юмшатилди
Хитой ҳукумати мамлакат бўйлаб коронавирус тарқалишини назорат қилиш учун жорий этилган чеклов чораларини юмшатди. “Анадолу” ёзишича, буни ХХР Давлат кенгаши COVID-19 пандемиясининг олдини олиш ва вазиятни назорат қилиш қўшма механизми томонидан эълон қилинган ҳужжат тасдиқлайди.
Энди асемптоматик инфекцияланганлар ва касалликни енгил ўтказаётганлар уй карантинида қолиши мумкин. Янги чора-тадбир, шунингдек, хасталанганларни 7 кун, беморлар билан алоқада бўлганларни 5 кун изоляция қилишни ҳам назарда тутади.
Ўтган ҳафта бир қатор йирик шаҳарлар, жумладан, Пекин ва Гуанжоуда чеклов чоралари юмшатилган. Ушбу енгиллик Хитой расмийлари мамлакатда коронавирус тарқалишини назорат қилиш бўйича олиб бораётган сиёсатда сезиларли ўзгариш юз берганини англатади.
Бундан буён мамлакатда ПЦР тести сертификати талаб қилинмайди, соғлиқни сақлаш коди мажбурий текширувдан ўтказилмайди. Фақат тиббиёт ва таълим муассасаларига киришда, қариялар уйида кекса киши билан кўришилганда соғлиқни сақлаш коди ва ПЦР тести тақдим этилиши шарт.
Ҳужжатда айтилишича, вирус тарқалиши хавфи юқори бўлмаган ҳудудлар одамлар ҳаракатини чекламаслиги, ишлаб чиқариш ва тадбиркорлик фаолиятини тўхтатмаслиги керак.
Маълумотга кўра, Урумчидаги воқеадан сўнг Хитойнинг кўплаб шаҳарларида COVID-19 билан боғлиқ карантин чекловига қарши норозилик намойиши бошланган.
Вазият кескинлашуви асносида Хитой расмийлари эпидемиянинг олдини олиш учун қўлланган касалликка қарши курашиш чораси юмшатилишини маълум қилганди.
ЎзА