Тожикистон Республикаси Президентининг Хитой Халқ Республикаси Давлат кенгаши Бош вазири Ли Тсян билан учрашуви
17 май куни давлат ташрифи доирасида Тинчлик ва миллий бирлик асосчиси – Миллат пешвоси, Тожикистон Республикаси Президенти муҳтарам Эмомали Раҳмон Хитой Халқ Республикаси Давлат кенгаши Бош вазири Ли Тсиен билан учрашди.
Учрашувда Тожикистон ва Хитой ўртасидаги ҳамкорликнинг кенг кўламли масалалари муҳокама қилинди.
Тожикистон Республикаси Президенти, муҳтарам Эмомали Раҳмон сўнгги ўн йил ичида Тожикистон ва Хитой ўртасидаги стратегик шериклик сифат жиҳатидан янги босқичга кўтарилгани, бу муносабатлар яхши қўшничилик ва самимий дўстлик намунаси эканини таъкидлади.
Мамлакатлар ўртасидаги товар айирбошлаш изчил ортиб бораётгани, ўтган йили унинг ўсиши қарийб 40 фоизни ташкил этгани алоҳида таъкидланди. Бу икки давлатга яқин келажакда товар айирбошлаш ҳажмини сезиларли даражада ошириш имконини беради.
Учрашувда икки давлат ўртасидаги саноат, энергетика, транспорт, қишлоқ хўжалиги, рақамли иқтисодиёт, электрон тижорат, йирик инфратузилма лойиҳаларини амалга ошириш ва тоғ-кон саноати соҳасида ҳамкорлик қилиш масалалари муҳокама қилинди.
Учрашувда қишлоқ хўжалиги маҳсулотларини, хусусан, пахта, сабзавот ва мевани қайта ишлаш соҳасига Хитойнинг замонавий технологияларини жалб этиш, пиллачилик ва фармацевтика соҳаларида ҳамкорликни ривожлантириш муҳим деб топилди.
Шу нуқтаи назардан, Тожикистоннинг кўпроқ қишлоқ хўжалиги маҳсулотларини Хитойга экспорт қилишга рухсат бериш билан боғлиқ масалани имкон қадар тезроқ ҳал қилиш зарур деб топилди.
Учрашув давомида томонларни қизиқтирган бошқа масалалар ҳам муҳокама қилинди.