Дар зарфи шаш моҳи соли равон 189 424 нафар сайёҳ аз мавзеъҳои сайёҳиву таърихии вилояти Хатлон дидан намуданд, ки аз ин шумора 3157 нафарро сайёҳони хориҷӣ ва 186 267 нафарро сайёҳони дохилӣ ташкил медиҳанд. Дар ин бора Шоҳзода Даврон, мудири шуъбаи рушди сайёҳии Мақомоти иҷроияи ҳокимияти давлатии вилояти Хатлон ба хабарнигори радиои “Овози тоҷик” Моҳираи Иброҳим хабар дод.
Бино ба иттилои номбурда, бештари сайёҳони ташрифоварда аз кишварҳои Афғонистон, Австралия, Бангладеш, Канада, Чин, Финландия, Германия, Ҳиндустон, Эрон, Қазоқистон, Нидерландия, Норвегия, Покистон, Россия, Шветсия, Туркия, ИМА ва Ӯзбекистон ба қайд гирифта шуданд.
Мавсуф афзуд, ки инрӯзҳо дар мамлакат соҳаи сайёҳӣ рушд намуда, барои ҷалби сайёҳони хориҷӣ шароити мусоид фароҳам оварда шудааст. Фаъолияти 18 адад ширкатҳои сайёҳӣ, 112 адад меҳмонхонаҳои ҷавобгӯ ба меъёрҳои байналмилалӣ,130 мавзеъҳои сайёҳӣ, 134 истироҳатгоҳу осоишгоҳҳо, 43 осорхона, 88 адад мағозаи фуруши армуғонҳо ва 115 ада зиёратгоҳҳо далели ин гуфтаҳоянд, ки ба рушди бахши сайёҳӣ мусоидат менамоянд.
“Бо мақсади боз ҳам тавсеа бахшидани соҳаи сайёҳӣ, истифодаи самараноки имкониятҳои мавҷуда дар ин самт, инкишофи инфрасохтори сайёҳӣ, беҳтар намудани сифатҳои хизматрасонӣ аз ҷониби мақомоти иҷроияи ҳокимитяи давлатии вилояти Хатлон тадбирҳои ҳадафманд андешида шуданд”,- гуфт Шоҳзода Даврон.
Маврид ба зикр аст, ки сайёҳӣ яке аз соҳаҳои муҳими иқтисоди миллӣ, аз ҷумла заминаи мусоид барои таъсиси ҷойҳои корӣ, рушди соҳибкорӣ буда, муаррифи фарҳангу таърихи ғании кишвар дар арсаи байналмилалӣ ба ҳисоб меравад. Ҷумҳурии Тоҷикистони дорои иқлими созгор, обу кӯлҳо, чашмаҳои мусаффову шифобахш, меваҳои шаҳдбор, кӯҳҳои осмонбӯс, пиряхҳои азим, набототу ҳайвонот ва манзараҳои беназири табиаташ макони беҳтарини сайругашт мебошад. Захираҳои сайёҳии кишвар барои рушди соҳа имкониятҳои хуб фароҳам овардааст.
