Душанбе: Намоишгоҳи байналмилалии сохтмонии «TajBuild» ҷараён дорад

Тавре хабарнигори радиои “Овози тоҷик” Нилуфари Нуриддин хабар дод, дар Намоишгоҳи мазкур намояндагони ширкатҳои сохтмонии дохилию хориҷӣ, Палатаи савдо ва саноати Ҷумҳурии Тоҷикистон, Мақомоти шаҳри Душанбе ва дигар сохторҳои давлатӣ ширкат доштанд.

Нахустин Намоишгоҳи байналмилалии сохтмонии «TajBuild» бо мақсади рушди соҳаи сохтмону меъморӣ ва саноат дар доираи Солҳои рушди саноат эълон гардидани солҳои 2022-2026 дар Ҷумҳурии Тоҷикистон ва иҷрои дастуру супоришҳои Президенти Ҷумҳурии Тоҷикистон муҳтарам Эмомалӣ Раҳмон ҷиҳати рушди соҳаи сохтмон ва меъморӣ бо ибтикори Ассотсиатсияи ширкати «TajBuild» дар ҳамкорӣ бо Палатаи савдо ва саноати Ҷумҳурии Тоҷикистон гузаронида шуд.

Бино ба иттилои номбурда, дар нахустин Намоишгоҳи байналмилалии сохтмонии «TajBuild» беҳтарин дастовардҳо ва таҷрибаи пешқадами ширкатҳои бонуфузи сохтмонии ватанию хориҷӣ, инчунин маҳсулоти сохтмонӣ, технологияҳои муосири сохтмонӣ, таҷҳизоти махсуси соҳавӣ ба маъраз гузошта шуданд.

Ширкаткунандагон аз сифат ва навъҳои масолеҳи сохтмонӣ дидан намуда, ба маҳсулоти пешниҳодгардида баҳои баланд доданд.

Ин намоишгоҳ аз шаш бахш – маҳсулоти сохтмонӣ ва ороишӣ, меъморӣ ва ороишӣ, сохтмони манзилҳои шаҳрӣ, коммуникатсияҳои муҳандисӣ, ва таҷҳизот, техникаҳои махсус, механизмҳо, асбобҳо, либосҳои махсуси соҳавӣ ва моликияти ғайриманқул иброт мебошад.

Ҳадафи баргузории он муаррифии имконияту иқтидорҳои сармоягузории ҷумҳурӣ, дарёфти шарикони рушд, таъсиси корхонаҳои муштарак, ворид намудани техникаву технологияи муосир, ҷалби сармояи хориҷӣ маҳсуб меёбад.

Намоишгоҳ имконият медиҳад, ки иштирокчиён молу маҳсулоти худро муаррифӣ намоянд. Барои рушди кору фаъолияти онҳо ва ворид шудан ба бозорҳои ҷаҳонӣ мусоидат мекунад.

Намоишгоҳи байналмилалии сохтмонии «TajBuild» то рӯзҳои 5 ва 6 август идома мекунад.