Имрӯз, 12 август Ввазири корҳои хориҷии Ҷумҳурии Тоҷикистон Сироҷиддин Муҳриддин ҳайати фаластиниро таҳти роҳбарии директори генералии Агентии ҳамкории байналмилалии Давлати Фаластин Имод Зуҳайрӣ ба ҳузур пазируфт. Дар ин бора Вазорати корҳои хориҷии Ҷумҳурии Тоҷикистон хабар медиҳад.
Дар мулоқот вазъи кунунии Фаластин ва минтақа, ҳамкории дуҷониба ва бисёрҷониба дар доираи созмонҳои байналмилалӣ, инчунин ҳамкорӣ дар самти иҷрои лоиҳаҳои муштараки иқтисодӣ ва кишоварзӣ бо ҳимояти ниҳодҳои байналмилалии молиявӣ мавриди баррасӣ қарор гирифт.
Ёдовар мешавем, ки муносибатҳои дипломатӣ миёни Ҷумҳурии Тоҷикистон ва Давлати Фаластин 6 марти соли 1992 барқарор шуданд.
Давлати Фаластин нахуст Сафири ғайримуқими худ дар Тоҷикистон Муҳаммад Таршаҳониро (бо иқоматгоҳ дар Тошканд) 5 марти соли 2014 таъйин намуд.
Соли 2020 Сафорати Давлати Фаластин дар шаҳри Душанбе ба фаъолият шурӯъ кард. Аз 18 феврали соли 2021 Сафири Давлати Фаластин дар Тоҷикистон Луай Исо мебошад.
Робитаҳои сиёсӣ миёни Тоҷикистон ва Фаластин ҳанӯз дар даврони шӯравӣ барқарор буданд. Тоҷикистон ҳамеша ҷонибдори муборизаи озодихоҳии мардуми Фаластин аст.
Ду даври машваратҳои сиёсӣ миёни вазоратҳои корҳои хориҷии Тоҷикистон ва Фаластин (29 марти соли 2017 ва 23-24 апрели соли 2018) баргузор гардидаанд.
Айни ҳол дар баррасии ҷонибҳо лоиҳаҳои 7 санади ҳамкорӣ дар соҳаҳои гуногун қарор дорад.
Дар чорабиниҳои байналмилалие, ки дар Ҷумҳурии Тоҷикистон баргузор мегарданд, ҳайатҳои Фаластин дар сатҳи баланд иштирок менамоянд. Аз ҷумла, дар кори Панҷумин иҷлосияи сарони кишварҳои узви Машварати ҳамкорӣ ва тадбирҳои боварӣ дар Осиё (Душанбе, 14-15 июни 2019) Вазири корҳои хориҷии Давлати Фаластин Риёз ал-Моликӣ иштирок намуд.
АХБОРИ МОНАНД:
Тоҷикистону Фаронса роҳандозии мактаби синамонигорон дар соли 2023-ро баррасӣ намуданд
Тоҷикистону Олмон ҷиҳати муаррифии имкониятҳои иқтисодӣ чорабиниҳои муштарак мегузаронанд
Мулоқоти Сироҷиддин Муҳриддин бо Руслан Мирзаев
Нишасти Гурӯҳи кории доимамалкунанда доир ба ҷалби сармояи хориҷӣ баргузор шуд
