Бо сарпарастии МДТ “Литсейи касбии хизмат ва туризми шаҳри Душанбе” ва Агентии Туркия оид ба ҳамкорӣ ва ҳамоҳангсозӣ (TIKO) дар шаҳри Душанбе маркази омӯзишии пазандагию хизматрасонӣ ба истифода дода шуд. Ташаббускори он Раиси Кумитаи рушди сайёҳии назди Ҳукумати Ҷумҳурии Тоҷикистон мебошад. Дар ин бора Вазорати меҳнат ва шуғли аҳолии Ҷумҳурии Тоҷикистон хабар дод.
Ба иттилои манбаъ, синфхона ва озмоишгоҳи ин марказ аз таъмири асосӣ бароварда шуда, бо таҷҳизоти нави замонавӣ муҷҷаҳаз гардонида шуданд.
Маркази омӯзишии пазандагию хизматрасонӣ дар дохили Литсейи касбии хизмат ва туризми шаҳри Душанбе бунёд ёфтааст.
Қобили зикр аст, ки бо Амри Президенти Ҷумҳурии Тоҷикистон аз 30 юми марти соли 2021, №АП-52, ба муассисаҳои таҳсилоти ибтидоии касбӣ сарпарастон вобаста карда шуда, дар ҳамкорӣ бо онҳо давра ба давра мушкилоти литсейҳои касбии техникӣ ҳаллу фасл гардида истодаанд.
