Имрӯз, 11 феврал дар Маркази мероси хаттии назди Раёсати Академияи миллии илмҳои Тоҷикистон осори ибни Сино дар ҳамоише баррасӣ гардид. Ҳадаф аз ин чорабинӣ муаррифии ибни Сино ва осори ӯ аз ҷониби олимон ва донишмандон буд. Нозим Маҳмадизода, директори институти мазкур бо таассуф гуфт, ки имрӯзҳо марказҳои илмӣ ва ниҳодҳои алоҳидаи давлатҳои гуногун матолиби таҳрифкоронае марбут ба шахсияти ибни Сино нашр мекунанд.
Бинобар ин, донишмандони тоҷик вазифаи худ медонанд, ки бо далелҳои илмиву таърихӣ тоҷику эрониасл будани ӯро ба ҷаҳониён бори дигар ёдрас кунанд. Дар ин мизи гирд тарҷумаи ҷилди 7- ум ва 9 — уми осори ибни Сино бо забонҳои тоҷикӣ ва русӣ низ муаррифӣ шуд. Таъкид карда шуд, Маркази Синошиносӣ ба ин нуқта намегузорад ва тамоми осори ибни Синоро бо забони тоҷикӣ тарҷума менамояд.
