Форуми байналмилалии заргарӣ ва Намоишгоҳ таҳти унвони «Дар саргаҳи хазинаи Амударё»
Имрӯз, 24 март Форуми байналмилалии заргарӣ аз ҷониби Вазорати саноат ва технологияҳои нав баргузор гардид.
Дар маросими ифтитоҳи форум Холиқзода Ҳоким Ҳикматулло, муовини аввал Сарвазири Тоҷикистон, роҳбарони Мақомоти маҳаллии ҳокимияти давлатӣ, вазорату идораҳо, намояндагони корпуси дипломатӣ, созмонҳои байналмилалӣ иштирок намуданд.
Дар ин чорабинӣ ҳамчунин беш аз 200 ширкат ва бренди заргарӣ, ҳунармандон ва тарроҳони инфиродӣ аз Озарбойҷон, Эрон, Қирғизистон, Қазоқистон, Чин, Покистон, Русия, Туркманистон, Туркия ва Узбекистон ширкат карданд.
Гардонандаи форум муҷрии барномаи маъруфи «Ҳукми мӯд »-и Шабакаи якуми Русия Лилия Рах буд.
Ҳадаф аз баргузории форумро Вазорати саноат ва технологияҳои навиТоҷикистон, таҳкими ҳамкорӣ бо шарикони байналмилалӣ дар тамоми силсилаи арзиши ҷаҳонӣ дар бахши заргарӣ, барқарор намудани робитаҳо байни ширкатҳое, ки дар саноати маъдан ва заргарӣ фаъолият мекунанд, инчунин мусоидат ба рушди устувори онҳо, табодули таҷриба байни иштирокчиён дар соҳаи истифодаи инноватсия ва технологияҳои нав дар соҳаи заргарӣ ва баланд бардоштани дониш ва таҷриба, таҳкими иқтидори касбии истеҳсолкунандагони маҳаллии заргарӣ, косибон, ҳунармандони ҷавон, дизайнерҳо унвон кардааст.
Дар чаҳорчӯби Форум дар Маркази байналмилалии намоишгоҳҳои Душанбе «Dushanbe Expo Centre” намоишгоҳи маҳсулоти заргарии брендҳои заргарии ватаниву хориҷӣ, созмонҳои ҳунарӣ ва тарроҳони заргарӣ ифтитоҳ ёфт, ки то 26 март идома меёбад. аҳсулоти заргарӣ кушода аст.
Илова ба намоишгоҳ ширкаткунандагон ва меҳмонони Форум дар намоиши мӯд ширкат хоҳанд кард, ки дар он коллексияҳои эксклюзивӣ, ҷавоҳирот ва маҳсулоти тарроҳону заргарони ҷавони Тоҷикистон, ки ба мавзӯи “Хазинаи Амударё” ва мероси заргарии тоҷикон ихтисос ёфтаанд, ба намоиш гузошта мешаванд. Коллексияҳои тарроҳӣ барои намоиши тавонмандии эҷодии тарроҳон ва заргарони ҷавони Тоҷикистон тарҳрезӣ шуда, аз ашёи хоми маҳаллӣ — металлҳои қиматбаҳо ва нимқиматбаҳо ва сангҳои қиматбаҳо сохта шудаанд.
Форуми байналмилалии заргарӣ ва Намоишгоҳи Тоҷикистон ба як майдони муассири муколама ва ҳамкориҳои минбаъда байни бозигарони соҳаи саноати кишварҳои хориҷӣ ва маҳаллӣ табдил ёфта, ҳамчунин барои дарёфти роҳҳои ҳалли татбиқи босамари лоиҳаҳои истеҳсоли маснуоти заргарӣ барои мақсадҳои гуногун ва муттаҳидсозии талошҳои намояндагони ҳукумат ва соҳибкорон мусоидат хоҳад намуд.
