Масъулини гурӯҳи ширкатҳои «БТК Групп»-и Федератсияи Русия барои дастгирии хоҷагиҳои пахтакорӣ ба ноҳияи Спитамени вилояти Суғд омада, барои тавсеаи фаъолияти корхонаи «СпитаменТекстайл» сармоягузорӣ намуда истодаанд. Дар ин бора Хадамоти матбуотии раиси вилояти Суғд хабар дод.
Ба иттилои манбаъ, соҳибкорони рус барои истеҳсоли пахта сармоягузорӣ намуда, техникаву таҷҳизоти заруриро ворид намудаанд.
Зимни боздиди Раиси вилоят аз ноҳияи Спитамен иттилоъ дода шуд, бо гирифтани ҳосили дилхоҳ коркарди пахта ва истеҳсоли маҳсулоти тайёр аз пахта ба роҳ монда шуда, садҳҳо нафар бо ҷойи корӣ таъмин карда мешаванд.
Ёдовар мешавем, ки моҳи феврали соли равон Раиси вилояти Суғд Раҷаббой Аҳмадзода дар шаҳри Москва бо роҳбарияти гурӯҳи ширкатҳои «БТК Групп» мулоқот намуда, таваҷҷуҳи сармоягузорони русро ба коркарди пахта ва истеҳсоли маҳсулоти ниҳоӣ дар заминаи корхонаи «СпитаменТекстайл» ҷалб намуда буд. Дар мулоқот зикр шуд, ки дар ноҳияи Спитамен ҳамасола кишти пахта ба роҳ монда шуда, дар заминаи корхонаи «СпитаменТекстайл» метавон коркарди пахта ва истеҳсоли маҳсулоти ниҳоиро ба роҳ монд, ки ба ин восита ҷойҳои нави корӣ таъсис дода шаванд. «Ҳамасола дар вилоят то 150 ҳазор тонна пахта истеҳсол шуда, имконот барои тавсеаи ҳамкорӣ фаровонанд»-, таъкид гардид дар идомаи мулоқот.
