Бонки миллии Тоҷикистон бо қарори Раёсат аз ворид кардани пулҳои коғазии нав ба муомилот хабар дод. Тибқи иттилои расмии шӯъбаи матбуоти БМТ, дар муомилот банкноти намунаи солҳои 2024 ва 2025 ба таври марҳилавӣ ҷорӣ мешавад. Аз ҷумла, банкноти 200 ва 500 сомонӣ (намунаи соли 2024) ва банкноти 20, 50 ва 100 сомонӣ (намунаи соли 2025) ба гардиши нақдӣ ворид мегарданд.
Мақомоти БМТ зикр карданд, ки ҳадаф аз ҷорӣ кардани пулҳои нав — осон кардани муомилоти нақдӣ, беҳтар кардани сифати пул ва баланд бардоштани сатҳи ҳимояи он аз қалбакӣ мебошад. Ҳамзамон, тадбирҳои мазкур дар доираи Қонуни Ҷумҳурии Тоҷикистон «Дар бораи Бонки миллии Тоҷикистон» амалӣ шуда, ба таъмини устуворӣ ва рушди иқтисоди миллӣ равона шудаанд.
Банкноти нав бо истифода аз технологияи муосири муҳофизатӣ истеҳсол шуда, ҳамаи талаботи амниятӣ ва эргономикӣ ба ҳисоб гирифта шудаанд. Ҷорӣ намудани онҳо тибқи нақшаи махсус ва бо расонидани маълумоти саривақтӣ ба аҳолӣ ва ташкилотҳои молиявӣ амалӣ мегардад.
