Комиссияи интихоботии Покистон рӯзи 21-уми октябр гуфт, сарвазири пешини ин кишвар Имрон Хон бо сабаби инки дар давраи маъмурияташ туҳфаҳои роҳбарони кишварҳои хориҷиро ғайриқонунӣ фурӯхтааст, ба муҳлати панҷ сол аз ҳаққи иштирок дар интихобот маҳрум шуд. Дар ин бора радиои «Машъал» иттилоъ додааст.
Имкрон Хонро, инчунин, ба пинҳон кардани маблағҳои бадастомада аз фурӯши баъзе тӯҳфаҳо гунаҳкор карданд. «Ӯ мебоист ҳамаи ин сарватро дар гузоришҳо сабт мекард»,-омадааст дар қарор.
Ба навиштаи манбаъ, Ҳукумати Покистон азхудкунии танҳо баъзе навъҳои туҳфаҳоро иҷозат медиҳад, ки аз арзиши муайяншуда гаронтар набошанд. Аммо, дар айби сарвазири собиқ туҳфаҳое сабт шудаанд, ки арзиши баланд доранд.
Гуҳар Хон, вакили дифои Имрон Хон, гуфтааст “мо алайҳи ин қарор ба Суди олии шаҳри Исломобод шикоят хоҳем кард”.
Комиссияи интихобот, ҳамчунин, қарор баровардааст, ки бояд бар зидди сарвазири собиқ парвандаи ҷиноӣ кушода шавад.
Дар вокуниш ба ин қарор ҳизби “Таҳрики инсоф”-и Имрон Хон ба роҳпаймоии эътирозии сулҳомез даъват карда,.Фавод Чодурӣ, сухангӯи сарвазири собиқ ба расонаҳо гуфтааст: “Мо ин қарорро эътироф намекунем. Мардуми Покистон ҳам қабул намекунанд. Аз мардум даъват мекунем, ки берун баромада, ҳукуматдоронро биронанд”.
Ҳуқуқшиносон мегӯянд, Имрон Хон, ки аз соли 2018 дар мақоми сарвазири Покистон кор кардаву моҳи апрели имсол аз курсиаш маҳрум шуд, аз ҳақи узвият дар порлумон ҳам бенасиб монд. Мақоми сарвазирӣ насиби Шаҳбоз Шариф шуд.
