
Чиркинтарин одами ҷаҳон дар 94-солагӣ вафот кард. Дар ин бора хабаргузории ИРНА хабар медиҳад.
Бино ба иттилои манбаъ, ин мард маъруф бо номи Ому Ҳоҷӣ тӯли 60 сол бо об ва собун худашро шустушӯ накарда буд ва пас аз як моҳи шустушӯ аз олам даргузашт.
Гуфта мешавад, Ому Ҳоҷӣ бинобар сабаби тарс доштан аз гирифторшавӣ ба беморӣ шустушӯ намекард. Ӯ дар як кулбаи хурдакаки сементблокӣ дар деҳаи Дейгаи Эрон зиндагӣ мекард, партовҳои аз роҳ ҷамъ кардаашро мехӯрд ва дар як ҷойи пур аз хоку лой мехобид.
Сокинони деҳа мегӯянд, ки Ому Ҳоҷӣ дар ҷавонӣ дучори мушкили равонӣ шудааст, ки дар 60 соли минбаъда аз шустушӯ даст кашидааст.
Сокинони маҳаллӣ дили ӯро барои шустушӯ кардан ёфтанд, вале маълум мешавад тозагӣ ба ӯ таъсири манфӣ расонида, боиси марги Ому Ҳоҷӣ гардид.