27 ноябр вазири корҳои хориҷии Беларус Владимир Макей даргузашт, хабар додааст сомонаи расмии ин ниҳод.
Сабаби марги вазирро мушаххас нагуфтаанд. Дирӯз дар робита ба даргузашти ин дипломати белорус ҳамтои тоҷикаш — вазири корҳои хориҷии Ҷумҳурии Тоҷикистон Сироҷиддин Муҳриддин ба ин ниҳод номаи тасаллият иросл намуд.
«Владимир Владимирович дипломати барҷаста буда, дар рушд ва таҳкими ҳамкориҳои дуҷонибаи Тоҷикистону Беларус саҳми арзанда гузошт. Мо ба ҳама наздикону пайвандони Владимир Владимирович Макей вобаста ба талафоти вазнин таъзияи самимӣ баён мекунем», — омадааст дар номаи тасаллияти ВКХ Тоҷикистон.
Владимир Макей 64-сола буд ва беш аз 10 сол — аз моҳи августи соли 2012 вазири корҳои хориҷии Беларус буд. Ӯ Донишкадаи давлатии омӯзгории забонҳои хориҷии Минск ва Академияи дипломатии Вазорати корҳои хориҷии Австрияро хатм кардааст. Солҳои 2000-2008 ёвари Президенти Ҷумҳурии Беларус ва солҳои 2008-2012 роҳбари дастгоҳи президенти ин кишвар буд.
