Имрӯз бахшида ба Рӯзи байналмилалии маъюбон, ки ҳамасола 3 декабр ҷашн гирифта мешавад, дар Китобхонаи миллии Тоҷикистон, мизи мудаввар бо иштироки намояндагони сохтору кумитаҳои дахлдори давлатӣ ва намояндагони ташкилотҳои ҷамъиятии маъюбон аз минтақаҳо баргузор гардид. Дар ин бора Маҳинбонуи Мирзо, мухбири радиои «Овози тоҷик» иттилоъ дод.
Ба зикри Асадулло Зикрихудоев, роҳбари Ташкилоти ҷамъиятии «Иттиҳодияи миллии маъюбони Тоҷикистон», имсол мавзӯи он аз ҷониби СММ «Роҳҳалҳои тағйирдиҳанда барои рушди фарогир: нақши навоварӣ дар таҳкими ҷаҳони дастрас ва одилона» эълон гардидааст, Ба зикри мавсуф, мақсад аз баргузории чорабинии мазкур, ин бори дигар баррасӣ ва муайян намудани рафти амалишавии НМА мебошад. Дар чорабинии имрӯза бошад ҳама сохтору кумитаҳои дахлдор, ки дар амалӣ намудани нақшачорабиниҳои барномаи мазкур масъулият доранд ҳисобот месупоранд.
Чорабинӣ бо ташаббуси ТҶ «Иттиҳодияи миллии маъюбони Тоҷикистон» ва дар хамкори бо Вазорати тандурустӣ ва ҳифзи иҷтимоии аҳолии ҶТ, Намояндагии СММ дар Тоҷикистон ва Барномаи Рушди СММ баргузор гардид.
Ёдовар мешавем, ки аз соли 1992 инҷониб бо Қарори Созмони Милали Муттаҳид санаи 3 декабр ҳамчун Рӯзи умумиҷаҳонии ғамхорӣ ба маъюбон пазируфта шудааст. Дар ин рӯз, дидорбинии маъюбон ва амалӣ намудани иқдомҳои хайрхоҳонаю кӯмакҳо нисбати онҳо гузаронида мешавад.
