Ҳаҷми гардиши савдои хориҷии кишвар бо Ҷумҳурии Исломии Эрон 44,6 млн. доллар афзоиш ёфтааст

Дар 11 моҳи соли 2021 ҳаҷми гардиши савдои хориҷӣ бо Ҷумҳурии Исломии Эрон 93,2 млн. доллари ИМА-ро ташкил дода, нисбат ба ҳамин давраи таҳлилии соли 2020 44,6 млн. доллар афзоиш ёфтааст.

Тибқи иттилои муовини Вазири рушди иқтисод ва савдои Ҷумҳурии Тоҷикистон Абдураҳмон Абдураҳмонзода зимни мулоқот бо роҳбари Маркази тиҷоратии «Фикри бартар»-и  Ҷумҳурии Исломии Эрон хонум Париноз Пешдодиён вазни хоси гардиши мол бо Ҷумҳурии Исломии Эрон дар ҳаҷми умумии гардиши савдои хориҷии Ҷумҳурии Тоҷикистон дар ин давра 1,7%-ро ташкил дода, дар сохтори гардиши савдои хориҷии Ҷумҳурии Тоҷикистон дар ҷойи 9-ум қарор дорад.

А. Абдураҳмонзода ҷиҳати боз ҳам рушд додани ҳамкории тиҷоративу иқтисодӣ пешниҳод намуд, ки дар ҳудуди минтақаҳои озоди иқтисодии Тоҷикистон корхонаҳои муштарак оид ба истеҳсоли обҳои минералӣ, хамираи помидор ва консерва таъсис дода шаванд. Хонум Париноз Пешдодиён пешниҳоди мазкурро хуш пазируфта, иброз намуд, ки ин ташаббус барои боз ҳам тақвият бахшидан ба ҳамкории тиҷоративу иқтисодии ду кишвар мусоидат хоҳад намуд.

Ҳамзамон дар вохӯрӣ омода ва ба имзо расонидани Ёддошти тафоҳум оид ба ҳамкорӣ миёни минтақаҳои озоди иқтисодии Тоҷикистон ва маркази мазкур, инчунин масъалаҳои муҳими ҳамкории минбаъдаи тиҷоративу иқтисодӣ ва сармоягузорӣ мавриди баррасӣ қарор гирифт.