Завқӣ Завқизода: Иқтисодиёти кишвар дар 5 соли оянда ду баробар зиёд шуда, сатҳи камбизоатӣ то 15 фоиз коҳиш дода мешавад

Имрӯз дар Вазорати рушди иқтисод ва савдо оид ба шарҳи ҷанбаҳои иқтисодии Паёми Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии кишвар аз 21 декабри соли 2021 ҳамоиш баргузор гардид, ки дар он Вазири рушди иқтисод ва савдо Завқизода Завқӣ Амин, Раиси Кумита оид ба иқтисод ва молияи Маҷлиси намояндагони Маҷлиси Олии Ҷумҳурии Тоҷикистон муҳтарам Файзуллозода Машраб, кормандони дастгоҳи марказии вазорат ва дигар коршиносони соҳа иштирок ва суханронӣ намуданд.

Тавре хабарнигори  радиои “Овози тоҷик” аз рафти нишаст  хабар медиҳад, зимни конфронс барномаи рушди кишвар барои 5 соли оянда, ки дар Паёми навбатии Президенти кишвар муҳтарам Эмомадӣ Раҳмон ироа гардид, баррасӣ шуд.

Зикр шуд, ки барномаи мазкур ҳадафу афзалиятҳо ва дурнамои нишондиҳандаҳои асосии рушди соҳаҳои иқтисоди миллиро муайян менамояд.  Аз ҷумла, дар ин давра рушди иқтисодӣ на кам аз 7 фоиз таъмин гардида, беш аз 500 ҳазор ҷойҳои нави корӣ таъсис ёфта, даромади пулии аҳолӣ беш аз 2 баробар зиёд мегардад ва ҳиссаи табақаи миёнаи аҳолӣ ба 45 фоиз расонида шуда, дар натиҷа сатҳи камбизоатӣ то 15 фоиз коҳиш дода мешавад.

Инчунин бо мақсади рушди соҳаи саноат ва боло бурдани иқтисодиёти кишвар солҳои 2022–2026 «Солҳои рушди саноат» эълон гардид.

Дар идомаи суханронӣ таъкид гардид, ки дар Паёми Пешвои муаззами миллат муҳтарам Эмомалӣ Раҳмон ба вазорату идораҳои дахлдор, аз ҷумла Вазорати рушди иқтисод ва савдо ҷиҳати пешгирии таъсири хавфҳои эҳтимолӣ ба иқтисоди миллӣ ва таъмини рушди иқтисодии устувори кишвар, истифодаи самараноку оқилонаи имконияту захираҳои мавҷуда ва дарёфти сарчашмаҳои нави рушди иқтисодӣ, баланд бардоштани қобилияти рақобати истеҳсолоти ватанӣ, ҷалби сармоя ва татбиқи стратегияву барномаҳои давлатӣ вазифагузориҳо карда шудааст.